តើអ្នកធ្លាប់ទេ? នៅយប់មុនថ្ងៃប្រឡង អ្នកកំពុងអង្គុយកត់ត្រាទាំងស្លន់ស្លោ ដើម្បីរំលឹកមេរៀនដែលអ្នកគួរតែរៀនតាំងពីប៉ុន្មានសប្តាហ៍មុន។ ដើម្បីជៀសវាងការសិក្សាទាំងសម្ពាធបែបនេះ យើងមានគន្លឹះសិក្សាចំនួន៧ ដើម្បីជួយអ្នក។

១. ចាប់ផ្ដើមឱ្យបានមុនការកំណត់

ការបង្អែបង្អង់គឺជាសត្រូវដ៏ធំ, ការចាប់ផ្ដើមរៀនយ៉ាងហោចណាស់ មួយសប្តាហ៍មុន ថ្ងៃប្រឡង ផ្ដល់ឱកាសឱ្យខួរក្បាលរបស់អ្នកស្រូបយកព័ត៌មានបានល្អ។ ការរៀនបន្តិចម្ដងៗក្នុងរយៈពេលច្រើនថ្ងៃ មានប្រសិទ្ធភាពជាងការរៀនបង្ខំក្នុងរយៈពេលត្រឹមតែមួយយប់។ វានឹងជួយឱ្យអ្នកចងចាំបានយូរ ដូច្នេះ នៅពេលដឹងកាលបរិច្ឆេទប្រឡងភ្លាម ត្រូវបែងចែកមេរៀនជាផ្នែកតូចៗ ហើយរៀបចំកាលវិភាគរៀនជារៀងរាល់ថ្ងៃ។

២. ស្វែងរកវិធីសាស្ត្រដែលត្រូវនឹងខ្លួនឯង (Active Recall)

កុំគ្រាន់តែអានឡើងវិញ ឬគូសចំណាំលើសៀវភៅ, វិធីដែលល្អបំផុតគឺ “ការរំលឹកដោយសកម្ម” (Active Recall) នោះគឺ បន្ទាប់ពីអានមេរៀនចប់ ត្រូវបិទសៀវភៅ រួចព្យាយាមសរសេរ ឬនិយាយខ្លាំងៗនូវអ្វីដែលអ្នកចាំ។ ការធ្វើបែបនេះជួយឱ្យខួរក្បាលហ្វឹកហាត់ទាញយកព័ត៌មានចេញមកក្រៅ ដែលវាស្រដៀងទៅនឹងស្ថានភាពពេលកំពុងប្រឡងដែរ។

៣. ធ្វើជាគ្រូបង្រៀនគេ

ប្រសិនបើអ្នកអាចពន្យល់មេរៀនទៅកាន់អ្នកដទៃឱ្យយល់តាមបែបងាយៗបាន មានន័យថា អ្នកពិតជាយល់ច្បាស់ពីមេរៀននោះហើយ។ សាកល្បងបង្រៀនមិត្តភក្តិ បងប្អូន ឬនិយាយពន្យល់ខ្លួនឯងនៅមុខកញ្ចក់។ វានឹងជួយឱ្យអ្នកដឹងភ្លាមៗថា ចំណុចណាខ្លះដែលអ្នកនៅស្ទើរ ដើម្បីត្រឡប់ទៅមើលបន្ថែម។

៤. សម្រាកឱ្យបានត្រឹមត្រូវ (វិធីសាស្ត្រ Pomodoro)

ការរៀនជាប់គ្នារាប់ម៉ោងដោយមិនសម្រាក នឹងធ្វើឱ្យខួរក្បាលរបស់អ្នកចុះខ្សោយ។ សាកល្បងប្រើបច្ចេកទេស Pomodoro ដោយ រៀនផ្ដោតអារម្មណ៍ខ្លាំង ២៥ នាទី, សម្រាករយៈពេល ៥ នាទី (ងើបឈរ បន្ធូរអារម្មណ៍ ឬញ៉ាំទឹក)។ ធ្វើបែបនេះឱ្យបាន ៤ ដង រួចសម្រាកវែង (១៥-៣០ នាទី)។

៥. កាត់ផ្ដាច់ការរំខាន

ទូរស័ព្ទគឺជាឧបសគ្គធំបំផុត ដូច្នេះ ពេលរៀន ត្រូវទុកទូរស័ព្ទនៅបន្ទប់ផ្សេង ឬបិទការផ្ដល់ដំណឹង (Notifications)។ ការរៀនដោយផ្ដោតអារម្មណ៍ត្រឹមតែ ៣០ នាទី មានតម្លៃជាងការអង្គុយរៀនបណ្ដើរ លេងទូរស័ព្ទបណ្ដើររយៈពេល ២ ម៉ោង។

៦. ហ្វឹកហាត់ជាមួយវិញ្ញាសាចាស់ៗ

ព្យាយាមរកលំហាត់ ឬវិញ្ញាសាឆ្នាំមុនៗមកអនុវត្ត, ការធ្វើលំហាត់ក្នុងលក្ខខណ្ឌដូចការប្រឡងមែនទែន នឹងជួយកាត់បន្ថយភាពភ័យខ្លាច ធ្វើឱ្យអ្នកស៊ាំទៅនឹងទម្រង់វិញ្ញាសា។ ប្រសិនបើគ្មានវិញ្ញាសាចាស់ទេ អ្នកអាចបង្កើតសំណួរដោយខ្លួនឯងដើម្បីសាកល្បងសមត្ថភាព។

៧. ថែរក្សាសុខភាពរាងកាយ

ខួរក្បាលនឹងមិនដំណើរការល្អទេ បើគ្មានការសម្រាក និងអាហារូបត្ថម្ភ ដូច្នេះ សូម គេងឱ្យបានយ៉ាងតិច ៧ ម៉ោងនៅយប់មុនប្រឡង។ ញ៉ាំអាហារដែលមានជាតិប្រូតេអ៊ីន និងកាបូអ៊ីដ្រាត (ដូចជា ស៊ុត អង្ករសម្រូប ឬធញ្ញជាតិ)។ ហើយ​កុំភ្លេចញ៉ាំទឹកឱ្យបានគ្រប់គ្រាន់ដើម្បីឱ្យខួរក្បាលស្រឡះ៕