អត្ថប្រយោជន៍ និងការប្រុងប្រយ័ត្ន ចំពោះ «ទឹកទទឹម»

ផ្លែទទឹម គឺជាផ្លែឈើមួយប្រភេទដែលពេញនិយម នៅក្នុងប្រទេសយើង ដោយសារវាមានរសជាតិជូរអែមឆ្ងាញ់ និងត្រូវបានគេដឹងថាមានសារធាតុចិញ្ចឹមខ្ពស់។ ទោះជាយ៉ាងណាក៏ដោយ ការញ៉ាំទឹកទទឹមមានទាំងចំណុចល្អ និងចំណុចដែលត្រូវប្រុងប្រយ័ត្នមួយចំនួនដែលយើងមិនគួររំលងឡើយ។

១. អត្ថប្រយោជន៍ចំពោះសុខភាព

នៅក្នុងទឹកទទឹមមានសារធាតុម្យ៉ាងហៅថា Punicalagins និង Polyphenols ដែលជាសារធាតុប្រឆាំងអុកស៊ីតកម្ម (ខ្លាំងជាងស្រាក្រហម និងតែបៃតងរហូតដល់ ៣ដង)។ វាមានតួនាទីជួយកាត់បន្ថយការរលាកក្នុងរាងកាយ និងការពារកោសិកាមិនឱ្យងាយខូចខាត ព្រមទាំងជួយឱ្យសរសៃឈាមដើរបានស្រួល ដែលជាចំណែកមួយជួយការពារបេះដូងផងដែរ។

ការសិក្សាមួយចំនួនក៏បានបង្ហាញផងដែរថា ទឹកទទឹមស្រស់មានសមាសធាតុដែលជួយពង្រឹងរាងកាយក្នុងការប្រឆាំងនឹងមេរោគឆ្លងផ្សេងៗ ជាពិសេសចំពោះអ្នកដែលមានជំងឺប្រចាំកាយ (ដូចជាលើសឈាម បេះដូង ទឹកនោមផ្អែម និងមហារីក)។

២. ចំណុចត្រូវប្រុងប្រយ័ត្ន និងផលប៉ះពាល់

ទោះបីជាទឹកទទឹមល្អ តែក្រុមមនុស្សខាងក្រោមនេះត្រូវប្រុងប្រយ័ត្នខ្ពស់៖

អ្នកមានជំងឺតម្រងនោមរ៉ាំរ៉ៃ ៖ ទឹកទទឹមសំបូរទៅដោយសារធាតុប៉ូតាស្យូម (Potassium) ខ្លាំង ដែលមិនល្អចំពោះអ្នកជំងឺតម្រងនោម (ព្រោះតម្រងនោមខ្សោយមិនអាចបញ្ចេញប៉ូតាស្យូមបានល្អ)។ គួរប្រឹក្សាជាមួយគ្រូពេទ្យមុននឹងញ៉ាំ។

ការប្រើប្រាស់លាយឡំជាមួយថ្នាំពេទ្យ ៖ ទឹកទទឹមអាចទៅទាស់ ឬកាត់បន្ថយប្រសិទ្ធភាពនៃថ្នាំមួយចំនួន ដូចជា ថ្នាំបញ្ចុះសម្ពាធឈាម និងថ្នាំជួយបេះដូង, ថ្នាំពង្រាវឈាម (ដូចជាថ្នាំ Warfarin), ថ្នាំគ្រប់គ្រង ជំងឺទឹកនោមផ្អែមជាដើម។

យ៉ាងណាក៏ដោយ ជាដំបូន្មានពីអ្នកជំនាញសុខភាព ប្រសិនបើលោកអ្នកទិញទឹកទទឹមដបស្រាប់ សូមពិនិត្យស្លាកសញ្ញាឱ្យច្បាស់ថា ជា «ទឹកទទឹមសុទ្ធ ១០០%» ជៀសវាងទិញចំទឹកទទឹមលាយ (Juice drinks/Cocktails) ដែលគេថែមស្ករគីមីច្រើន។ តែបើអាច គួរ ញ៉ាំផ្លែទទឹមស្រស់ទាំងគ្រាប់ ល្អជាងការកៀបយកតែទឹកញ៉ាំ។ ហើយប្រសិនបើបងប្អូនមានជំងឺប្រចាំកាយ (លើសឈាម ទឹកនោមផ្អែម ឬតម្រងនោម) ហើយកំពុងលេបថ្នាំពេទ្យប្រចាំកាយ គួរតែសួរនាំគ្រូពេទ្យជាមុនសិន៕

លោក សេក សត្យា | Mr. Sek Sathya

លោក សេក សត្យា មានបទពិសោធន៍ធ្វើការលើវិស័យសារព័ត៌មានរយៈ ពេលជាង ១០ឆ្នាំ និងជាផលិតករកម្មវិធីព័ត៌មានទូរទស្សន៍ ។

អត្ថប្រយោជន៍​ និង​ការ​ប្រុងប្រយ័ត្ន ​ចំពោះ​ «​ទឹក​ទទឹម​»

លោក សេក សត្យា | Mr. Sek Sathya

អត្ថប្រយោជន៍ និងការប្រុងប្រយ័ត្ន ចំពោះ «ទឹកទទឹម»