ទោះជា​ស្ថិត​ក្នុងជីវភាព​ក្រីក្រ នៃគ្រួសារ​កសិករ ក្នុង​ភូមិដាច់​ស្រយាល​មួយ នៃខេត្តកំពង់ចាម អ្នកស្រី លឹម លីឆាយ មិន​អាច​លាក់​បាំង​ក្តីស្រមៃរបស់​ខ្លួន​​ក្នុង​ការ​បន្តការសិក្សា​ថ្នាក់​ឧត្តមសិក្សា​នៅ​ប្រទេសជឿនលឿន​នោះទេ។ ចាប់តាំង​​ពី​អ្នកស្រី​ស្ថិត​ក្នុង​ការ​សិក្សា​នៅកម្រិត​វិទ្យាល័យម្ល៉េះ អ្នកស្រីបាន​ដាក់​គោលដៅថា អ្នកស្រី​ត្រូវ​បន្តការសិក្សា​ជាន់​ខ្ពស់​នៅ​ប្រទេសអូស្ត្រាលីឱ្យ​បាន។

ប៉ុន្តែ​ការតាំងចិត្ត​នេះ មិន​ងាយ​ស្រួល​សម្រាប់​អ្នក​ស្រីនោះ​ឡើយ ពោលគឺ អ្នកស្រី​ត្រូវ​រៀប​ចំ​ផែនការ​យ៉ាង​ច្បាស់​លាស់​ ដែល​មាន​លក្ខណៈយុទ្ធសាស្ត្រ។ នោះគឺ កសាង​បទពិសោធន៍​ក្នុង​ជីវិត បង្កើត​ទំនាក់​ទំនង​ក្នុង​សង្គម និង​ស្វែង​រក​​អាហាររូបករណ៍​សម្រាប់​ការសិក្សា។

និយាយត្រឡប់ទៅកាន់អតីតកាល អ្នកស្រី លឹម លីឆាយ មានស្រុក​កំណើតនៅភូមិកំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម, កាលពីវ័យកុមារ អ្នកស្រី លឹម លីឆាយ គឺរស់​នៅ​ក្នុងបរិស្ថាន​ដែល​កុមារ​នៅ​ក្នុង​ភូមិមិន​អាច​រៀន​សូត្រ​បាន​វែងឆ្ងាយ ជាពិសេស​កូន​ស្រី ក្នុង​គ្រួសារ​កសិករ ដោយ​​មិន​សូវមាន​ឪកាស​រៀន​សូត្រ​បាន​ខ្ពង់​ខ្ពស់​នោះឡើយ។

ហេតុដូច្នេះ ក្នុងអំឡុងពេលសិក្សានៅវិទ្យាល័យ អ្នកស្រី ត្រូវធ្វើការងារស្ម័គ្រចិត្តបណ្ដើរ ដើម្បីមានលទ្ធភាពផ្គត់ផ្គង់ការរៀន​សូត្រ​ដោយ​ខ្លួនឯង ក៏ដូចជាស្វែងរកបទពិសោធន៍ជីវិត។ មុន​នឹង​បញ្ចប់​ការ​សិក្សា​នៅ​កម្រិត​មធ្យម​សិក្សា អ្នក​ស្រី​​ លីឆាយ បាន​ចាប់​ផ្តើម​ស្វែង​រក​អាហារ​រូប​ករណ៍​ទៅ​រៀន​នៅ​ក្រៅ​ប្រទេស។​ ហើយ​ទី​បំផុត អ្នកស្រី ទទួលបាន​អាហារូបករណ៍ទៅសិក្សានៅបង់ក្លាដេស មុន​ការ​ប្រកាស​លទ្ធផលប្រឡងបាក់ឌុប នៅឆ្នាំ២០១២។

សម្រាប់​អ្នក​ស្រី លឹម លីឆាយ នេះជាឱកាស និងជាស្ពានសម្រាប់​បន្តដំណើរ​ទៅកាន់​ប្រទេសអូស្ត្រាលី។

ខ្ញុំត្រូវតែចាប់វាសិន ហើយនៅពេលដែលខ្ញុំបានទៅសិក្សានៅទីនោះ ខ្ញុំនឹងបង្កើ​នសមត្ថភាពភាសាអង់គ្លេស ចំណេះដឹងផ្នែកទំនាក់ទំនងជាមួយប្រជាជនទូទាំងអាស៊ី…

អ្នកស្រី លឹម លីឆាយ បាន​ចំណាយ​ពេល​ ៤ ឆ្នាំ នៅសាកលវិទ្យាល័យអាស៊ីសម្រាប់ស្ត្រី (Asian University of Women) ក្នុងប្រទេសបង់ក្លាដែស លើជំនាញនយោបាយ ទស្សនវិជ្ជា និងសេដ្ឋកិច្ច ដោយសិក្សាថ្នាក់បរិញ្ញាបត្រ ហើយ​ទីបំផុត​អ្នកស្រីក៏​​ទទួល​បាន​បរិញ្ញាបត្រ​មួយ​សន្លឹក។ ប៉ុន្តែឪកាសទៅសិក្សា​នៅ​ប្រទេស​អូស្ត្រាលី មិន​ទាន់​មក​ដល់​នៅឡើយ ដូច្នេះអ្នកស្រី​ត្រូវ បន្តការសិក្សា​ជំនាញសេដ្ឋកិច្ចនយោបាយនៅទីក្រុងហុងកុង, ការសិក្សាពីបញ្ហាសង្គមពាក់ព័ន្ធនឹងគ្រោះទឹកជំនន់ និងរញ្ជួយដី នៅហ្វីលីពីន និងទៅសិក្សានៅអាមេរិកក្នុងកម្មវិធីកម្មសិក្សា ស្តីពីភាពជាអ្នកដឹកនាំ និងឆ្លៀតបំពេញការងារ នៅតាមបណ្ដាអង្គការជាតិ អន្តរជាតិ និងវិស័យឯកជន មួយ​ចំនួន។

លើ​ផ្លូវ​ដ៏វែងឆ្ងាយ ទីបំផុតទៅ ពោលគឺនៅឆ្នាំ២០២៣ អ្នកស្រី លឹម លីឆាយ បានប្រឡងជាប់អាហារូបករណ៍ ថ្នាក់អនុបណ្ឌិតជំនាញ គោលនយោបាយសាធារណៈ នៅសាកលវិទ្យាល័យ អាឌែលឡេត (Adelaide) នៃប្រទេសអូស្ត្រាលី។ ហើយ​អ្នកស្រី នឹង​បញ្ចប់​ការ​សិក្សាចុង​ក្រោយ​នេះ នៅពាក់កណ្តាល​ឆ្នាំ២០២៥ខាងមុខ។

ក្នុងវ័យ ៣១ឆ្នាំ លីឆាយ គឺជាកូន​ពៅ ក្នុងគ្រួសារដែល​មាន​កូន​សរុប ៧នាក់។ ហើយ​អ្នក​ស្រីក៏ជា​កូនតែម្នាក់​គត់​ក្នុង​គ្រួសារ​ដែលមាន​ឪកាស​បន្តការសិក្សាដល់​ឧត្តមសិក្សា។ អ្នកស្រីក៏ជា​យុវជន​ដ៏​កម្រ​បំផុតមួយនៅ​ក្នុង​ភូមិ​ដែល​បានជម្នះ​ការសិក្សា​ដោយ​ជោគជ័យ។

រៀបការ​នៅឆ្នាំ២០២១ ដោយ​មិន​ទាន់​ក្លាយជា​ម្តាយ​គេ​នៅឡើយ អ្នក​ស្រី​ លឹម លីឆាយ គ្រោង​នឹង​វិល​ត្រឡប់​មក​កាន់​ប្រទេស​កម្ពុជាវិញ ដើម្បីរួម​ចំណែក​ក្នុង​សង្គម៕