សហភាពអឺរ៉ុប ប្រចាំនៅកម្ពុជា បានប្រកាសផ្តល់ថវិកា​ចំនួន ៨លានអឺរ៉ូ ដើម្បី​ចូលរួម​វិនិយោគលើមូលធន​មនុស្ស​កម្ពុជា តាមរយៈកម្មវិធីអាហារូបករណ៍ “ជ្រើសរើសអឺរ៉ុបសម្រាប់វិទ្យាសាស្ត្រ” (Choose Europe for Science)។

កញ្ចប់ថវិកា ៨លានអឺរ៉ូ នេះ នឹងគាំទ្រ​ដល់និស្សិត​កម្ពុជា​ចំនួន ៨០នាក់ ដើម្បីបន្តការ​សិក្សាផ្នែក STEM នៅ​តំបន់អឺរ៉ុប។ កញ្ចប់ថវិកា ក៏​រួម​បញ្ចូលទាំងកម្មវិធីផ្លាស់ប្តូរ​គ្រូបង្រៀន និង​កម្មសិក្សា​ ទៅកាន់ប្រទេស​អាល្លឺម៉ង់, បារាំង និងប្រទេស​ហ្វាំងឡង់ផងដែរ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការផ្តល់ថវិកា ៨លានអឺរ៉ូ របស់សហភាពអឺរ៉ុបនេះ គឺជាការវិនិយោគ​ដ៏​មានសារៈសំខាន់ និង​មាន​ចក្ខុវិស័យ​វែងឆ្ងាយ​សម្រាប់​មូលធន​មនុស្ស​របស់កម្ពុជា ដោយ​នឹង​អនុញ្ញាត​ឱ្យ​និស្សិត​កម្ពុជា​ដែល​មាន​សមត្ថភាព អាច​បន្ត​ការ​សិក្សា​កម្រិត​បរិញ្ញាបត្រ បរិញ្ញាបត្រ​ជាន់ខ្ពស់ និងបណ្ឌិត លើជំនាញវិទ្យាសាស្រ្ត បច្ចេកវិទ្យា វិស្វកម្ម និង​គណិតវិទ្យា (STEM) នៅ​សាកលវិទ្យាល័យ​ឈាន​មុខនានា​ក្នុង​តំបន់អឺរ៉ុប។

ឯកឧត្តមរដ្ឋមន្រ្តីបញ្ជាក់ថា ការវិនិយោគនេះ ក៏​មានគោលបំណងបំពាក់បំប៉នយុវជនកម្ពុជានូវជំនាញបច្ចេកទេសកម្រិតខ្ពស់ ដើម្បីគាំទ្រដល់ការផ្លាស់ប្តូររបស់កម្ពុជាទៅជាសេដ្ឋកិច្ចផ្អែកលើចំណេះដឹង និងឌីជីថល។ ដោយ​ជាមួយ​គ្នាកម្មវិធីនេះ ក៏​នឹងជួយពង្រឹងការផ្ទេរចំណេះដឹង ការច្នៃប្រឌិត និងសមត្ថភាពស្រាវជ្រាវនៅក្នុងប្រទេសកម្ពុជា ព្រមទាំងរឹតចំណងមិត្តភាពរវាងប្រជាជនកម្ពុជា និងអឺរ៉ុប។

ចាប់តាំងពីឆ្នាំ២០០៣មក សហភាពអឺរ៉ុប បានក្លាយ​ជា​ដៃគូ​អភិវឌ្ឍ​ដ៏សំខាន់​មួយ​របស់រាជរដ្ឋាភិបាលកម្ពុជា ដែលតែងផ្តល់ការគាំទ្រដល់វិស័យអប់រំ។ តាមរយៈភាពជាដៃគូនេះ ក្រសួងអប់រំ​ យុវជន និងកីឡា បាន​សម្រេច​នូវ​សមិទ្ធផលគួរ​ឱ្យ​កត់សម្គាល់ជាច្រើន ចាប់តាំងពីការបង្កើនអត្រាចុះឈ្មោះចូលរៀននៅគ្រប់កម្រិត រហូតដល់ការលើកកម្ពស់គុណភាពអប់រំដែលត្រូវបានទទួលស្គាល់ទាំងក្នុងកម្រិតជាតិ និងតំបន់។

យ៉ាងណាក៏ដោយតាមរយៈ កម្មវិធីអាហារូបករណ៍ “ជ្រើសរើសអឺរ៉ុបសម្រាប់វិទ្យាសាស្ត្រ” (Choose Europe for Science) ឯកឧត្តមបណ្ឌិតសភាចារ្យ ហង់ជួន ណារ៉ុន ជឿជាក់ថា នឹងចូលរួមចំណែកយ៉ាងសំខាន់ក្នុងការបណ្តុះបណ្តាលធនធានមនុស្សកម្ពុជាឱ្យមានសមត្ថភាពខ្ពស់ ទាំងផ្នែកចំណេះដឹង និងបច្ចេកទេស ដើម្បីក្លាយជាសសរទ្រូងដ៏រឹងមាំក្នុងការអភិវឌ្ឍសង្គមជាតិ៕