រដ្ឋមន្រ្តីក្រសួងមុខងារសាធារណៈ ជំរុញសិស្សានុសិស្សប្រឹងប្រែងរៀនឱ្យអស់ពីលទ្ធភាព សម្រាប់ការប្រឡងបាក់ឌុបនាពេលខាងមុខ

រដ្ឋមន្រ្តីក្រសួងមុខងារសាធារណៈ ឯកឧត្តម ហ៊ុន ម៉ានី បានជំរុញដល់សិស្សានុសិស្សដែលត្រៀមប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅឆ្នាំនេះទាំងអស់ សូមបន្តខិតខំប្រឹងប្រែងរៀនសូត្រឱ្យអស់ពីលទ្ធភាព ដើម្បីអាចប្រឡងជាប់គ្រប់ៗគ្នា ពិសេសគឺទទួលបាននិទ្ទេសល្អក្នុងការប្រឡង។

ក្នុងពិធីសម្ពោធដាក់ឱ្យប្រើប្រាស់បណ្ណាល័យមរតកក្រមង៉ុយ ស្ថិតនៅក្នុងវិទ្យាល័យ ហ៊ុន សែន មង្គលបពិត្រ និងវិទ្យាល័យ ស្លាបលែង ក្នុងភូមិកៀ ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ កាលពីថ្ងៃអង្គារ (២៣ មិថុនា) ឯកឧត្តម ហ៊ុន ម៉ានី ដែលក៏ជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកំពង់ស្ពឺ ក៏បានអំពាវនាវដល់លោកគ្រូ អ្នកគ្រូ រួមទាំងក្រុមការងារមន្ទីរ សូមបន្តជួយជ្រោមជ្រែងឱ្យអស់លទ្ធភាព និងគ្រប់រូបភាព ដើម្បីធានាបានថា សិស្សានុសិស្សនឹងទទួលបានលទ្ធផលល្អ ឆ្លើយតបនឹងការខិតខំប្រឹងប្រែងរៀនសូត្ររបស់ពួកគេជាច្រើនឆ្នាំមកនេះ។

ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ក្នុងឆ្នាំនេះ គ្រោងនឹងប្រព្រឹត្តទៅនៅថ្ងៃទី១០ ខែសីហា ឆ្នាំ២០២៦។ កាលពីឆ្នាំទៅ ខេត្តកំពង់ស្ពឺ មានសិស្សជាប់និទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ ចំនួន ៧៩នាក់។

សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ឯកឧត្តម ហ៊ុន ម៉ានី រំពឹងថា អ្នកដែលប្រឡងជាប់ និងមាននិទ្ទេស A នឹងមានការកើនឡើងលើសពីបណ្តាឆ្នាំមុនៗ ក្រោមទិសស្លោក “អ្នកចេះគឺជាប់”។ ឯកឧត្តមមានប្រសាសន៍ថា ក្រោយបញ្ចប់ការប្រឡងនិងប្រកាសលទ្ធផល រាជរដ្ឋាភិបាលក៏ដូចជាសកលវិទ្យាល័យជាច្រើនបាននិងកំពុងរងចាំផ្តល់ការលើកទឹកចិត្ត និងផ្តល់អាហារូបករណ៍សម្រាប់អ្នកទទួលបានជ័យលាភីនិទ្ទេសល្អ ពីការប្រឡងនេះ៕

លោក សេក សត្យា | Mr. Sek Sathya

លោក សេក សត្យា មានបទពិសោធន៍ធ្វើការលើវិស័យសារព័ត៌មានរយៈ ពេលជាង ១០ឆ្នាំ និងជាផលិតករកម្មវិធីព័ត៌មានទូរទស្សន៍ ។