ក្រសួងអប់រំ យុវជន និងកីឡា កំពុងតែរៀបចំ​សាងសង់លេណដ្ឋានពហុបំណង​នៅ​តាមទីតាំង​មួយ​ចំនួន​ក្នុង​តំបន់ព្រំដែន​ដែលប្រឈម​ហានិភ័យខ្ពស់ ក្នុងគោល​​បំណង​ការ​ពារសុវត្ថិភាពបុគ្គលិកអប់រំ លោកគ្រូអ្នកគ្រូ និង​សិស្សានុសិស្សក្នុងករណីមានហេតុការណ៍អាសន្ន។

ក្រសួងអប់រំមិនបានបញ្ជាក់ពីចំនួនសាលារៀន​ដែលនឹង​ត្រូវ​សាងសង់លេណដ្ឋានពហុបំណងនេះទេ ប៉ុន្តែបើតាមប្រសាសន៍លោកជំទាវ ឃួន វិច្ឆិកា អ្នកនាំពាក្យ​ក្រសួងអប់រំ យុវជន និងកីឡា ប្រាប់បណ្តាញ​ព័ត៌មានក្នុងស្រុកមួយថា លេណដ្ឋានចំនួន១០ កំពុងតែរៀបចំសាងសង់តាមទីតាំងមួយចំនួនក្នុងតំបន់ព្រំដែន ដែលប្រឈម​ហានិភ័យខ្ពស់ និង​អាច​ចូលទៅសាងសង់បាន។ ​លោកជំទាវបញ្ជាក់ថា នៅតាម​សាលារៀន​មួយចំនួន មិនអាច​អនុញ្ញាត​ឱ្យចូល​ដំណើរការ​សាងសង់​បានទេ ដោយសារតែ​ហានិភ័យ​ពី​សំណល់​យុទ្ធភណ្ឌ​មិនទាន់​ផ្ទុះ ដែល​នៅតែ​បង្ក​គ្រោះថ្នាក់​ក្នុង​តំបន់​នោះ​។​

ការសាងសង់លេណដ្ឋានពហុបំណងនេះ ត្រូវប្រើប្រាស់មូលនិធិ​របស់ក្រសួងអប់រំ យុវជន និងកីឡា ដែល​មានការ​ចូលរួមពី​សប្បុរសជននានា ។ បើតា​ម​ក្រសួងអប់រំ ការសង់លេណដ្ឋាននេះ ក៏​ជាផ្នែកមួយ​នៃការអប់រំ​អំពីហានិភ័យ និង​ការ​រក្សា​សុវត្ថិភាព​ពីគ្រោះមហន្តរាយនានា ដោយបង្កប់​នូវការ​បង្រៀនសិស្ស​ឱ្យ​ចេះការពារខ្លួន និង​យល់ដឹងពីរបៀបឆ្លើយតបទៅនឹង​ស្ថានភាព​អាសន្នផងដែរ។

កាលពីថ្ងៃទី២៥ ខែមីនា ឯកឧត្តមបណ្ឌិតសភាចារ្យ ហង់ជួន ណារ៉ុនឧបនាយករដ្ឋមន្រ្តី និងជារដ្ឋមន្រ្តីក្រសួងអប់រំ យុវជន និងកីឡា បានចុះពិនិត្យ​ការ​ដ្ឋានសាងសង់អគារសិក្សា និង​លេណដ្ឋាន ក្នុងបរិវេណអនុវិទ្យាល័យជាំក្សាន្ត ស្ថិត​ក្នុងស្រុកជាំក្សាន្ត ខេត្តព្រះវិហារ។ អនុវិទ្យាល័យនេះកំពុងសាងសង់អគារសិក្សាចំនួន ១ខ្នង មាន ៥បន្ទប់ ដែលទទួលបានការឧបត្ថម្ភថវិកាសាងសង់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ​កម្ពុជា និងលេណដ្ឋានចំនួន ១ ដែលទទួលបានការឧបត្ថម្ភថវិកាសាងសង់ដោយមូលនិធិសាមគ្គីក្រសួងអប់រំ យុវជន និងកីឡា។ ដូច្នេះនេះដែរ កាលពីដើមខែមីនានេះ ឯកឧត្តមរដ្ឋមន្រ្តី ក៏បានបង្ហាញពីការចុះពិនិត្យ​ការសាងសង់អគារសិក្សា និងលេណដ្ឋាន ដែលទទួលបាន​ការ​ឧបត្ថម្ភពីសម្តេចនាយករដ្ឋមន្រ្តី នៅសាលាបឋមសិក្សា គីរីវ័ន្តសែនជ័យ ស្ថិត​ក្នុង​ខេត្ត​ឧត្តរមានជ័យ។

ជម្លោះព្រំដែនកម្ពុជា-ថៃ កាលពីចុងឆ្នាំ២០២៥ បានធ្វើ​ឱ្យ​សាលារៀនសរុបចំនួន២៧នៅតាម​បណ្តោយព្រំដែនរងការខូចខាត​ទៅលើអគារសិក្សា និង​ហេដ្ឋារចនាសម្ព័ន្ធអប់រំ ដោយ​ប៉ាន់ប្រមាណថា មានតម្លៃសរុបជាង ៦លានដុល្លារ៕