ការឃើញទារកកើតមកមានសាច់ឈាមទ្រលុកទ្រលន់ គួរឱ្យស្រឡាញ់ គឺជាក្តីប្រាថ្នារបស់ឪពុកម្តាយគ្រប់រូប។ ប៉ុន្តែ តាមផ្នែកវេជ្ជសាស្ត្រ ទារកដែលមានទម្ងន់ «ធំធាត់ខុសធម្មតា» ពេលសម្រាល អាចជាសញ្ញាព្រមានមួយនៃបញ្ហាសុខភាពគួរឱ្យព្រួយបារម្ភ ទាំងចំពោះមាតា និងទារកផ្ទាល់។
បណ្ដាញផ្សព្វផ្សាយយើងខ្ញុំផ្សេងទៀត
- ព័ត៌មានទូទៅ
- សេដ្ឋកិច្ច
- អប់រំ
- កីឡា
- កម្សាន្ត
- អរិយធម៌ខ្មែរ
- Politico 360
- One-Minute
- សច្ចធម៌ប្រវត្តិសាស្ត្រ
- វឌ្ឍនភាពកម្ពុជា
- អំពីក្រុមហ៊ុន
ស្រ្តីមានផ្ទៃពោះគួរដឹង! គ្រោះថ្នាក់ដែលនឹកស្មានមិនដល់ នៃ «ការសម្រាលទារកលើសទម្ងន់» និងវិធីសាស្ត្របង្ការ
Advertisement
តើទារកលើសទម្ងន់ពេលកើត អាចបង្កផលប៉ះពាល់អ្វីខ្លះ? ហើយតើមាតាគួរត្រៀមខ្លួនបែបណា?
យោងតាមការពន្យល់ពីអ្នកជំនាញ ទារកដែលចាត់ទុកថាលើសទម្ងន់ គឺជាទារកដែលមានទម្ងន់ចាប់ពី ៤,០០០ ក្រាម (៤ គីឡូក្រាម) ឡើងទៅ ឬស្ថិតក្នុងកម្រិតលើសពី ៩០ Percentile នៃទម្ងន់ជាមធ្យមរបស់ទារកធម្មតា។ តាមការសិក្សាស្រាវជ្រាវ បានបង្ហាញថា មានស្រ្តីមានផ្ទៃពោះប្រមាណពី ១% ទៅ ១០% ដែលអាចផ្តល់កំណើតដល់ទារកដែលមានទម្ងន់ខុសប្រក្រតីបែបនេះ។
ស្វែងយល់ពីមូលហេតុចម្បងៗ
កត្តាដែលធ្វើឱ្យទារកក្នុងគភ៌មានទម្ងន់ធំខុសធម្មតា រួមមាន៖
-ជំងឺទឹកនោមផ្អែមលើស្ត្រីជាម្តាយ៖ ការគ្រប់គ្រងកម្រិតជាតិស្ករមិនបានត្រឹមត្រូវក្នុងអំឡុងពេលមានផ្ទៃពោះ ជាមូលហេតុចម្បងបំផុត។
-ការឡើងទម្ងន់របស់មាតា៖ ម្តាយឡើងទម្ងន់លឿន ឬខ្លាំងខុសពីធម្មតាក្នុងកំឡុងពេលពពោះ។
-កត្តាតំណពូជ៖ ឪពុក ឬម្តាយ មានមាឌធំ ឬមានប្រវត្តិធាត់ខ្លាំង។
ផលវិបាក និងហានិភ័យ
ការសម្រាលទារកដែលមានទម្ងន់ធំ មិនត្រឹមតែបង្កការលំបាកដល់មាតាប៉ុណ្ណោះទេ ប៉ុន្តែថែមទាំងដាក់សម្ពាធ និងគ្រោះថ្នាក់ដល់ទារកទៀតផង៖
១. ផលប៉ះពាល់ចំពោះមាតា
-ជួបការលំបាកខ្លាំងក្នុងការសម្រាលតាមផ្លូវធម្មជាតិ។
-មានអត្រាប្រឈមខ្ពស់ក្នុងការឈានទៅរក ការវះកាត់សម្រាល។
២. ហានិភ័យលើទារកក្នុងផ្ទៃ និងអំឡុងពេលសម្រាល
-ទារកអាចប្រឈមនឹងការកើតមិនគ្រប់ខែ ឬមានភាពមិនប្រក្រតីពីកំណើត។
-គ្រោះថ្នាក់ពេលសម្រាល៖ ទារកអាចជួបបញ្ហា «ជាប់ស្មា» ដែលបណ្តាលឱ្យរងរបួសសរសៃប្រសាទដៃ (មិនអាចលើកដៃរួច) ឬអាចបាក់ឆ្អឹង។
-ករណីធ្ងន់ធ្ងរបំផុត គឺអាចប្រឈមនឹងការបាត់បង់ជីវិត (ស្លាប់ក្នុងពោះ)។
៣. ផលវិបាកក្រោយពេលកើត
-កង្វះជាតិស្ករក្នុងឈាម (Hypoglycemia)៖ អាចធ្វើឱ្យទារកប្រកាច់ ឬប៉ះពាល់ដល់កោសិកាខួរក្បាល។
-មានវិបត្តិផ្លូវដង្ហើម (ហត់ដង្ហក់ និងថ្ងូរ)។
-កំហាប់ឈាមខាប់ខុសធម្មតា ដែលបណ្តាលឱ្យទារកមាន ខាន់លឿងខ្លាំង និងអូសបន្លាយពេលយូរ។
-អាចមានបញ្ហាសាច់ដុំបេះដូងរីកធំ។
វិធានការបង្ការ និងការព្យាបាល ដើម្បីសុវត្ថិភាពមាតា និងទារក
ដើម្បីជៀសវាងនូវគ្រោះថ្នាក់ទាំងឡាយណាដែលកើតឡើងជាយថាហេតុ គ្រូពេទ្យជំនាញបានណែនាំនូវវិធីសាស្ត្រសំខាន់ៗដូចខាងក្រោម៖
ការតាមដានផ្ទៃពោះឱ្យបានទៀងទាត់៖ ត្រូវជួបជាមួយវេជ្ជបណ្ឌិតឯកទេសផ្នែកសម្ភព ដើម្បីពិនិត្យ វាស់ប្រវែង និងប៉ាន់ប្រមាណទម្ងន់ទារកតាមរយៈ អេកូសាស្ត្រ។ ការធ្វើបែបនេះ ជួយឱ្យគ្រូពេទ្យអាចវាយតម្លៃ និងរៀបចំផែនការសម្រាលដ៏សុវត្ថិភាពបំផុត។
គ្រប់គ្រងជំងឺទឹកនោមផ្អែម៖ ចំពោះស្រ្តីដែលមានប្រវត្តិ ឬកំពុងមានជំងឺទឹកនោមផ្អែមអំឡុងពេលមានផ្ទៃពោះ ត្រូវពិគ្រោះយោបល់ជាមួយគ្រូពេទ្យឯកទេស ដើម្បីគ្រប់គ្រងកម្រិតជាតិស្ករឱ្យបានម៉ឺងម៉ាត់។
ត្រួតពិនិត្យរបបអាហារ៖ គួរទទួលទានអាហារដែលមានជីវជាតិគ្រប់គ្រាន់ ប៉ុន្តែត្រូវចៀសវាងការបរិភោគដែលធ្វើឱ្យឡើងទម្ងន់ខុសប្រក្រតី។ ការឡើងទម្ងន់ហួសហេតុ មិនត្រឹមតែប៉ះពាល់ពេលសម្រាលទេ តែវាអាចបង្កជាជំងឺទឹកនោមផ្អែម ជំងឺបេះដូង លើសឈាម និងជំងឺធាត់ ដល់មាតានិងទារកទៅថ្ងៃអនាគត។
ការថែទាំកម្រិតខ្ពស់ក្រោយសម្រាល៖ ករណីទារកកើតមកមានទម្ងន់ធ្ងន់ ពួកគេនឹងត្រូវបញ្ជូនទៅកាន់ផ្នែកទារកភ្លាមៗ ដើម្បីឱ្យគ្រូពេទ្យឯកទេសផ្នែកកុមារ ធ្វើការវាយតម្លៃ ពិនិត្យ តាមដាន និងព្យាបាលយ៉ាងដិតដល់៕
ប្រភព ៖ មន្ទីរពេទ្យកាល់ម៉ែត
លោក សេក សត្យា | Mr. Sek Sathya
លោក សេក សត្យា មានបទពិសោធន៍ធ្វើការលើវិស័យសារព័ត៌មានរយៈ ពេលជាង ១០ឆ្នាំ និងជាផលិតករកម្មវិធីព័ត៌មានទូរទស្សន៍ ។
ឆ្នាំ២០២៥ © រក្សាសិទ្ធិគ្រប់យ៉ាងដោយ៖ អគ្គនាយកដ្ឋានវិទ្យុ និងទូរទស្សន៍អប្សរា