នៅថ្ងៃទី១២ ខែមិថុនា កន្លងទៅ Ariana Grande បានប្រកាសបើកដំណើរការមូលនិធិ Brighter Days Ahead Foundation ដើម្បីជួយគាំទ្រដល់សិទ្ធិរបស់ក្រុមអ្នកស្រឡាញ់ភេទដូចគ្នា និងក្រុមអ្នកកែភេទ រួមទាំងការផ្តល់នូវសេវាសុខភាពផ្លូវចិត្តដល់មនុស្សនៅក្នុងសហគមន៍ LGBTQIA+។

Ariana Grande បានសរសេរសាររៀបរាប់អំពីមូលនិធិ Brighter Days Ahead Foundation តាមរយៈគណនី Instagram ថា៖ “បេសកកម្មរបស់យើងគឺ ការគាំទ្រ ការពារ និងផ្តល់ធនធានផ្សេងៗដល់មិត្តភក្តិដែលងាយរងគ្រោះរបស់យើង ដែលកំពុងតែត្រូវការជំនួយ”។

តារាចម្រៀងវ័យ ៣២ ឆ្នាំរូបនេះបានឱ្យដឹងបន្ថែមថា៖ “តាមរយៈមូលនិធិផ្សេងគ្នាចំនួន ៤ នេះ យើងនឹងអាចជួយដល់បណ្តាអង្គការដ៏អស្ចារ្យណា ដែលកំពុងផ្តល់កន្លែងសុវត្ថិភាព និងការមើលថែ ដែលកំពុងតែមានតម្រូវការយ៉ាងខ្លាំងនៅពេលបច្ចុប្បន្ននេះ”។

មូលនិធិទាំង ៤ របស់ Brighter Days Ahead Foundation រួមមាន៖

• មូលនិធិ Protect and Defend Fund ដែលត្រៀមខ្លួនរួចជាស្រេចក្នុងការគាំទ្រដល់សកម្មជនក្នុងតំបន់ ដែលធ្វើការដើម្បីទាមទារសិទ្ធិសម្រាប់ LGBTQIA+ សិទ្ធិពលរដ្ឋ និងសមធម៌យេនឌ័រ ក៏ដូចជាសុខភាពបន្តពូជ។
• មូលនិធិ Heal and Dream Fund មានគោលដៅក្នុងការជួយឱ្យមនុស្សគ្រប់គ្នាអាចទទួលបានការថែទាំសុខភាពផ្លូវចិត្ត និងការគាំទ្រពីសហគមន៍ ដើម្បីឱ្យពួកគេមានអារម្មណ៍ថា មានអ្នកដឹង មានអ្នកយល់ និងអាចព្យាបាលផ្លូវចិត្តបាន។
• មូលនិធិ Seen and Celebrated Fund មានបំណងពង្រីក “សំឡេង និងរឿងរ៉ាវ” របស់ក្រុមមនុស្សដែលមានភាពចម្រុះខាងភេទ ឱ្យគេបានដឹង និងបានឮកាន់តែទូលំទូលាយ។
• មូលនិធិ Emergency Support Fund នឹងផ្តល់ជំនួយសម្រាប់ស្ថានភាពបន្ទាន់នានាឱ្យបានទាន់ពេលវេលា។

កាលពីដើមខែមិថុនា កន្លងទៅ Ariana Grande ទើបតែបានចាប់ផ្ដើមដំណើរប្រគំតន្ត្រីទេសចរណ៍ The Eternal Sunshine Tour ដោយក្រោយបញ្ចប់កម្មវិធីនៅក្នុងទីក្រុង Los Angeles កាលពីថ្ងៃទី១៤ ខែតែមួយ មូលនិធិ Brighter Days Ahead Foundation ក៏បានផ្តល់ការគាំទ្រដល់អង្គការក្នុងតំបន់ ដូចជា Los Angeles LGBT Center មជ្ឈមណ្ឌលថែទាំសុខភាពផ្លូវចិត្ត Didi Hirsch និងអង្គការ I Need An A៕