Victoria Beckham បានបង្ហើបអំពីការរស់នៅក្នុងជីវិតយ៉ាងមានក្ដីសុខ និងជឿជាក់ ក្នុងវ័យ ៥២ ឆ្នាំ ជាមួយសារព័ត៌មាន The Times កាលពីចុងខែ ឧសភា កន្លងទៅ ដោយតារាស្រីរូបនេះជឿថា ការមានអាយុច្រើនមិនមែនជាបញ្ហារំខានចិត្តរបស់ខ្លួនឡើយ។

តារាស្រីវ័យ ៥២ ឆ្នាំរូបនេះ បានបើកចិត្តនិយាយពីការផ្លាស់ប្ដូររបស់ខ្លួនក្នុងផ្លូវវិជ្ជមានថា៖ “ខ្ញុំបានចំណាយពេលភាគច្រើនក្នុងជីវិតរបស់ខ្ញុំ ទៅលើការមានអារម្មណ៍ថា ខ្លួនឯងមិនទាន់ល្អគ្រប់គ្រាន់ ឬមិនចូលចិត្តរូបរាងមុខមាត់របស់ខ្លួនឯង។ ខ្ញុំគិតថាចំណុចល្អនៃការមានអាយុកាន់តែច្រើន គឺនៅពេលនេះខ្ញុំអាចទទួលយករូបរាងមុខមាត់របស់ខ្លួនឯងបានហើយ។ វាពិតជាល្អជាងមុនឆ្ងាយណាស់”។

“ម្យ៉ាងទៀត ខ្ញុំមិនគិតថា មនុស្សយើងត្រូវបោះបង់ ឬបញ្ឈប់ខ្លួនឯង គ្រាន់តែដោយសារយើងឈានមកដល់វ័យ ៥០ ឆ្នាំនោះទេ។ វាមិនមែនមានន័យថា អ្នកត្រូវតែបន្ថយល្បឿនជីវិត ឬហាមឃាត់ខ្លួនឯងមិនឱ្យធ្វើអ្វីនោះឡើយ។ អ្នកនៅតែអាចធ្វើខ្លួនឱ្យមើលទៅស្រស់ស្អាត និងទាក់ទាញបានដដែល”។ ភរិយារបស់លោក David Beckham និយាយដូច្នេះ។

ជាថ្មីម្ដងទៀត អ្នកម្ដាយកូន ៤ រូបនេះ នៅតែបញ្ជាក់ថា បញ្ហាអាយុមិនគួរជាឧបសគ្គនៃជីវិតនោះទេ ដោយតារាស្រីរូបនេះលើកឡើងថា៖ “ខ្ញុំមិនបានធ្វើអ្វីដែលខុសប្លែកពីមុននោះឡើយ បើនិយាយពីការហាត់ប្រាណ។ តាមពិតទៅ ខ្ញុំហាត់ប្រាណខ្លាំងជាងកាលពីខ្ញុំនៅវ័យ ២០ និង ៣០ ឆ្នាំទៅទៀត។ ការដែលអ្នកមានអាយុកាន់តែច្រើន មិនមែនមានន័យថា អ្នកត្រូវតែកំណត់ព្រំដែននៃអ្វីដែលខ្លួនអ្នកអាចធ្វើបាននោះទេ។ អ្នកនៅតែអាចសម្រេចគោលដៅផ្សេងៗបានដូចគ្នា ទោះបីជាមានអាយុកាន់តែច្រើនក៏ដោយ”។

Victoria Beckham ក៏បានទម្លាយនូវចំណុចល្អមួយទៀតនៃការមានអាយុជ្រេផងដែរថា៖ “អ្វីដែលអស្ចារ្យបំផុតនៃការមានអាយុកាន់តែច្រើន គឺខ្ញុំមិនខ្វល់ខ្វាយទាល់តែសោះថា អ្នកដទៃនឹងគិតយ៉ាងណា។ ខ្ញុំអាចគ្រប់គ្រងទស្សនៈ និងការយល់ឃើញរបស់ខ្លួនឯងបានហើយនៅពេលនេះ”៕