ស្នាដៃភាពយន្តខ្លី ២ រឿង ផលិតដោយ រ៉េត សារីតា ត្រូវ CIFF ជ្រើសយកមកចាក់បញ្ចាំង

កាលពីរាត្រីម្សិលមិញ បវរកញ្ញាចក្រវាលកម្ពុជា ២០២០ រ៉េត សារីតា បានបង្ហាញវត្តមានក្នុងពិធីបើកមហោស្រពភាពយន្តអន្តរជាតិកម្ពុជា នៅឯសាលសន្និសីទចតុមុខ។ ទាយទៅមើល៍ ថាការបង្ហាញវត្តមានរបស់អ្នកនាង ក្នុងពេលនេះ ក្រោមហេតុផលអ្វីដែរ?

មហាជន អ្នកតាមដាន ក៏ដូចជាអ្នកស្នេហាវិស័យផលិតកុន ប្រាកដជាបានជ្រាបហើយថា មហោស្រពភាពយន្តអន្តរជាតិកម្ពុជា ក្នុងឆ្នាំទី ១៥ នេះ បានជ្រើសរើសភាពយន្តខ្លី ២ រឿង ដែលជាស្នាដៃផលិតរបស់ MUC រ៉េត សារីតា ក្រោមចំណងជើង «សំនៀងផ្កាលើវាលខ្សាច់» និងរឿង «ឆ្អឹងមិនអណ្ដែត»។

រឿងទាំង២នេះគឺសមិទ្ធផលក្នុងរយៈពេល ២ ឆ្នាំចុងក្រោយរបស់បវរកញ្ញា រ៉េត សារីតា ក្នុងនាមជាផលិតករខ្មែរមួយរូប ដែលបានរួមគ្នាបញ្ចេញស្នាដៃមួយនេះ ឱ្យលេចត្រដែតឡើងគួរជាទៅមោទនភាព ហើយការលើកយករឿងខ្លីទាំង២ មកចាក់បញ្ចាំងនៅលើ SCREEN នាពេលនេះ គឺជាឱកាសនៃការបើកបង្ហាញស្នាដៃដ៏ឆ្នើមរបស់ផលិតករ អ្នកនិពន្ធ និងអ្នកដឹកនាំ ក៏ដូចជាក្រុមការងារនៃវិស័យភាពយន្តក្នុងស្រុកផងដែរ។

គួរឱ្យដឹងថា ខ្សែរឿងជីវិតក្នុងភាពយន្តខ្លី «សំនៀងផ្កាលើវាលខ្សាច់» ក៏បានបញ្ចូលចម្រៀងមនោសញ្ចេតនាដែលជាតាក់តែងនិពន្ធ និងច្រៀងដោយផ្ទាល់ពីកញ្ញា ស៊ីន សេដ្ឋសុជ្ឈតា ចៅស្រីរបស់អធិរាជសំឡេងមាស ស៊ីន ស៊ីសាមុត ដែលមានចំណងជើងថា «បំពេរឈូកតូច»។

ខាងក្រោមនេះជាពេលវេលា និងទីតាំងនៃការចាក់បញ្ចាំងខ្សែរឿងទាំង២ (Cambodia in Short 2) ៖ ថ្ងៃ សុក្រ ទី ២៧ ខែ មីនា ចាប់ពីម៉ោង ៦ ល្ងាច ដល់ ៧៖៥៦ យប់ នៅរោងកុន Fable Cinema (Factory Phnom Penh) និងថ្ងៃ សៅរ៍ ទី ២៨ ខែ មីនា ចាប់ពីម៉ោង ១៖៣០ នាទីរសៀល ដល់ ៣៖២៦ នៅរោងកុន LEGEND Premium Exchange Square HALL 1៕

រូបភាព ៖ Reth Sarita

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។