នៅថ្ងៃទី៨ ខែមេសា នេះ Cha Eun Woo បានចេញមុខបកស្រាយអំពីបញ្ហាពន្ធដារនាពេលថ្មីៗនេះ និងបានបញ្ជាក់ថា ខ្លួនបានបង់បង្គ្រប់លើប្រាក់ពន្ធ ២០ប៊ីលានវ៉ុន ឬ ១៣លានដុល្លារដែលមានបញ្ហា រួចរាល់ហើយ។

ក្នុងសេចក្ដីប្រកាសផ្លូវការដែលចែករំលែកនៅលើគណនីបណ្ដញសង្គម តារាខេប៉ុបរូបនេះបានចាប់ផ្ដើមដោយសុំទោសចំពោះការព្រួយបារម្ភជុំវិញការចោទប្រកាន់ពីបញ្ហាគេចពន្ធថា៖ “ខ្ញុំសូមទោសដោយស្មោះ ចំពោះការបង្កឱ្យមានការខកបំណង និងការភាន់ច្រឡំដល់អ្នកគាំទ្រ ក៏ដូចជាមនុស្សជាច្រើនទៀត ដោយសារតែជម្លោះពន្ធដារនាពេលថ្មីៗនេះ”។

តារាប្រុសវ័យ ២៩ឆ្នាំបានបន្តថា៖ “ខ្ញុំគោរពនូវនីតិវិធី និងលទ្ធផលរបស់ភ្នាក់ងារពន្ធដារជាតិ ហើយបានបង់ពន្ធដែលពាក់ព័ន្ធទាំងអស់ ដើម្បីការពារកុំឱ្យមានការភាន់ច្រឡំបន្ថែមទៀត។ ខ្ញុំក៏នឹងបន្តអនុវត្តតាមនីតិវិធីដែលនៅសេសសល់ឱ្យបានខ្ជាប់ខ្ជួនផងដែរ”។

Cha Eun Woo បានបង្ហាញជំហររបស់ខ្លួនថា៖ “ប្រសិនបើមានចំណុចណាដែលខ្ញុំខកខានមិនបានពិនិត្យឱ្យបានហ្មត់ចត់ ការទទួលខុសត្រូវទាំងស្រុង គឺស្ថិតនៅលើរូបខ្ញុំ។ ខ្ញុំនឹងមិនដោះសារដោយនិយាយថា ខ្ញុំមិនបានដឹង ឬថាវាជាការសម្រេចចិត្តរបស់អ្នកដទៃនោះទេ”។

សមាជិក្រុម Astro រូបនេះ បានពន្យល់ថា លោកបានបង្កើតសាជីវកម្មមួយដើម្បីគ្រប់គ្រងសកម្មភាពការងារឱ្យមានស្ថិរភាពជាងមុន ប៉ុន្តែលោកបានទទួលស្គាល់ថា មានផ្នែកខ្លះដែលលោកមិនបានពិនិត្យដោយប្រុងប្រយ័ត្ននៅពេលបើកដំណើរការនោះ។ ស្របគ្នានេះ លោកបានសង្កត់ធ្ងន់ថា ការទទួលខុសត្រូវនេះមិនមែនស្ថិតនៅលើគ្រួសារ ឬក្រុមហ៊ុនរបស់លោកនោះទេ គឺស្ថិតនៅលើរូបលោកតែម្នាក់ប៉ុណ្ណោះ។

សូមរំឭកថា នៅដើមឆ្នាំ ២០២៦ នេះ Cha Eun Woo បានផ្ទុះរឿងអាស្រូវ បន្ទាប់ពីមានការចោទប្រកាន់ពីបទគេចពន្ធជាង ២០ ប៊ីលានវ៉ុន ប្រហែល ១៣ លានដុល្លារអាមេរិក ពាក់ព័ន្ធនឹងសាជីវកម្មមួយដែលបង្កើតឡើងដោយម្ដាយរបស់លោក។

ជាកិច្ចបញ្ចប់នៃសេចក្តីថ្លែងការណ៍ តារាពហុជំនាញបានសម្តែងការសោកស្តាយយ៉ាងខ្លាំងចំពោះអ្នកគាំទ្ររបស់លោក ដោយនិយាយថា លោកនឹងប្រយ័ត្នប្រយែងជាមុន ដើម្បីការពារកុំឱ្យបញ្ហាស្រដៀងគ្នានេះកើតឡើងម្តងទៀត៕