កាលពីថ្ងៃទី១៨ ខែមិថុនា កន្លងទៅ កូនបាល់ម៉ាក Louis Vuitton ដែល Felix បានបរិច្ចាគ រួមជាមួយហត្ថលេខារបស់លោក បានលក់ចេញនៅក្នុងពិធីដេញថ្លៃសប្បុរសធម៌របស់ក្រុមហ៊ុន Sotheby’s ដើម្បីប្រមូលថវិកាបរិច្ចាគជូនដល់អង្គការ UNICEF។

ដើមឡើយ ក្រុមហ៊ុន Sotheby’s បានប៉ាន់ប្រមាណថា បាល់ទាត់ Louis Vuitton Monogram ដែលមានហត្ថលេខារបស់សមាជិកក្រុម Stray Kids រូបនេះ អាចនឹងលក់ចេញក្នុងតម្លៃប្រហែល ២ ០០០ ដុល្លារអាមេរិកប៉ុណ្ណោះ។ យ៉ាងណាមិញ ក្រោយបញ្ចប់ការដេញថ្លៃ បាល់នេះបានលក់ចេញក្នុងតម្លៃរហូតដល់ ២៨ ១៦០ ដុល្លារអាមេរិក។

ថវិកាទាំងអស់ដែលទទួលបានពីការលក់ក្នុងកម្មវិធីដេញថ្លៃ Louis Vuitton for UNICEF នឹងជួយជ្រោមជ្រែងដល់កុមារដែលងាយរងគ្រោះនៅទូទាំងសកលលោក តាមរយៈគំនិតផ្តួចផ្តើមមនុស្សធម៌របស់អង្គការ UNICEF។

បាល់ទាត់ Louis Vuitton Monogram ខាងលើ បានបង្កើតឡើងក្នុងឱកាសអបអរសាទរខួប ១០ ឆ្នាំ នៃភាពជាដៃគូរវាង Maison Louis Vuitton និងអង្គការ UNICEF ទន្ទឹមគ្នានឹងព្រឹត្តិការណ៍ World Cup ឆ្នាំ ២០២៦ ផងដែរ។

គួរឱ្យដឹងដូចគ្នា Felix គឺជាទូតសុច្ឆន្ទៈរបស់យីហោ Louis Vuitton តាំងពីឆ្នាំ ២០២៣ មក ខណៈលោកក៏ជាសមាជិកដែលមានវ័យក្មេងជាងគេបំផុត នៅក្នុងក្រុមអ្នកបរិច្ចាគធំៗ UNICEF Honors Club៕