Harry Styles បានក្លាយជាបុគ្គលម្នាក់ក្នុងចំណោមអ្នកដែលបង់ពន្ធជូនរដ្ឋច្រើនបំផុតនៅក្នុងចក្រភពអង់គ្លេស ទាំង ១០០លំដាប់ របស់ Sunday Times 2026 Tax List ដោយតារាប្រុសរូបនេះស្ថិតនៅក្នុងចំណាត់ថ្នាក់ទី ៥៤។

នៅដើមខែកុម្ភៈនេះ សារព័ត៌មាន BBC បានរាយការណ៍ថា សិល្បករវ័យ ៣២ ឆ្នាំបានជាប់ឈ្មោះក្នុងបញ្ជីអ្នកបង់ពន្ធច្រើនបំផុតរបស់អង់គ្លេសជាលើកដំបូង ដោយសារតែភាពជោគជ័យជាបន្តបន្ទាប់ពីអាល់ប៊ុម Harry’s House។

ស្នាដៃនេះបានធ្វើឱ្យ Harry Styles ទទួលបានចំណូលពីការប្រគំតន្ត្រីទេសចរណ៍ Love On Tour បូករួមនឹងការលក់វត្ថុអនុស្សាវរីយ៍ក្នុងចន្លោះឆ្នាំ ២០២៣ និង ២០២៤ សរុបជាង ៥១.៨ លានផោន ឬប្រមាណ ៧០.៦លានដុល្លារអាមេរិក។

ក្នុងនោះ ចំណូលស្ទើរតែទាំងអស់បានជាប់ពន្ធក្នុងអត្រា ៤៥ភាគរយ។​ មានន័យថា ក្នុងឆ្នាំនេះ អតីតសមាជិកក្រុម One Direction បានបង់ពន្ធជូនរដ្ឋសរុបចំនួន ២៤.៧ លានផោន ឬប្រមាណ ៣៣.៦ លានដុល្លារអាមេរិក។

ក្រៅពី Harry Styles បុគ្គលល្បីៗផ្សេងទៀតដែលជាប់ឈ្មោះក្នុងបញ្ជីនេះ រួមមាន JK Rowling អ្នកនិពន្ធរឿង Harry Potter ជាប់ចំណាត់ថ្នាក់លេខ ៣៦ ដោយបានបង់ពន្ធចំនួន ៦៤.៦លានដុល្លារអាមេរិក​ និងតារាចម្រៀង Ed Sheeran ជាប់ចំណាត់ថ្នាក់លេខ ៦៤ ដោយបានបង់ពន្ធចំនួន ៣៧លានដុល្លារអាមេរិក។

ទន្ទឹមគ្នានេះ កីឡាករបាល់ទាត់ Erling Haaland ក៏បានជាប់ចំណាត់ថ្នាក់លេខ ៧២ ជាមួយនឹងការបង់ពន្ធប្រមាណ ២៣លានដុល្លារ ក្នុងវ័យត្រឹមតែ ២៥ ឆ្នាំប៉ុណ្ណោះ ដែលធ្វើឱ្យលោកបានក្លាយជាបុគ្គលដែលមានវ័យក្មេងជាងគេបំផុតនៅក្នុងបញ្ជីឆ្នាំនេះ៕