ទូរទស្សន៍ដ៏ធំរបស់ជប៉ុន TBS បានធ្វើការចាក់ផ្សាយអំពីតារាហ៊ីបហបកម្ពុជា វណ្ណដា ក្នុងកម្មវិធី Crazy Journey ដោយបានចុះថតទីតាំងផ្ទាល់ដែលតារាប្រុសរូបនោះ រស់នៅក៏ដូចជាកន្លែងលោកធ្លាប់ជួយឪពុកម្ដាយរកស៊ីកាលពុំទាន់ក្លាយជាតារារ៉េបលំដាប់ប្រទេស។
មហាជនជាច្រើនប្រាកដជាបានជ្រាបហើយថា វណ្ណដា មានដើមកំណើតមកពីខេត្តព្រះសីហនុ និងមានឪពុកម្ដាយជាអ្នកប្រកបរបរកោសដូងនៅក្នុងផ្សារលើ។ មុនឈានជើងចូលសិល្បៈក្នុងវិស័យហ៊ីបហប វណ្ណដា តែងទៅជួយឪពុកម្ដាយជាប្រចាំនៅទីនោះ។
ពិតជាមិននឹកស្មាន ទូរទស្សន៍ដ៏ធំរបស់ជប៉ុនTBS បានចុះថត និងបានធ្វើការចាក់ផ្សាយសកម្មភាព ក៏ដូចទីតាំងដែលរូបលោកធ្លាប់បានជួយឪពុកម្ដាយនៅឯផ្សារលើក្នុងខេត្តព្រះសីហនុ ព្រមទាំងបានចុះថតសកម្មភាពនៅផ្ទះរបស់លោកថែមទៀតផង។
តារារ៉េប វណ្ណដា បានបង្ហាញអារម្មណ៍រំភើបព្រោះថាលោកបានសម្រេចក្ដីស្រមៃដែលប៉ងតាំងពីក្មេង និងបានអរគុណចំពោះតារារ៉េបជនជាតិជប៉ុន Awich ដៃគូក្នុងចម្រៀង «6 years in the game» ដែលនាងមិនត្រឹមបានមកលេងប្រទេសកម្ពុជាថែមទាំងជួយបង្ហាញសិល្បៈ វប្បធម៌របស់ខ្មែរថែមទៀតផង។
គួរឱ្យដឹងថា តាមរយៈការចាក់ផ្សាយពីតារាហ៊ីបហបកម្ពុជារូបនេះនៅក្នុងកម្មវិធីលំដាប់របស់ជប៉ុន Crazy Journey បានធ្វើឱ្យ វណ្ណដា ទទួលបានការគាំទ្របន្ថែមពីសំណាក់អ្នកគាំទ្រជប៉ុនថែមទៀតផង៕
ចុចទីនេះដើម្បីទស្សនាវីដេអូ ៖ facebook.com/reel/2039988479897147/?s=single_unit
រូបភាព ៖ Vann Da
