ផ្អែកតាមការចុះផ្សាយរបស់ Kbizoom នៅថ្ងៃទី៧ ខែមេសា នេះ Jisoo បាននាំយកកាបូបយីហោប្រណិត Dior មកចែកជូនជាកាដូដល់បុគ្គលិក​ប្រចាំក្រុមហ៊ុនខ្លួន ដោយកាបូបខ្លះមានតម្លៃខ្ពស់ដល់ទៅ ៤.៤៥លានវ៉ុន ឬប្រមាណ ២ ៩៥០ ដុល្លារអាមេរិក។

កាលពីពេលថ្មីៗនេះ បុគ្គលិកពីទីភ្នាក់ងារ BLISSOO ដែលជាក្រុមហ៊ុនរបស់តារាស្រីវ័យ ៣១ឆ្នាំផ្ទាល់បានចែករំលែករូបភាពនៅលើបណ្តាញសង្គម បង្ហាញពីកាដូដែលទទួលបានពី CEO ស្រី អមជាមួយសំណេរខ្លីបង្ហាញពីទំនាក់ទំនងកក់ក្ដៅដូចជា “ស្រឡាញ់អ្នកណាស់ CEO” “Jisoo គឺល្អបំផុត” និង “អរគុណបងស្រី” ជាដើម។

កាដូទាំងនោះគឺជាកាបូបម៉ាក Dior ដែល Jisoo គឺជាទូតសុច្ឆន្ទៈលំដាប់ពិភពលោកស្រាប់។ យោងតាមតម្លៃដាក់លក់លើគេហទំព័រផ្លូវការ កាបូបនីមួយៗមានតម្លៃជាង ៤ លានវ៉ុន ឬ ២ ៦៥០ដុល្លារអាមេរិក ដោយក្នុងនោះមានកាបូបមួយមានតម្លៃប្រហែល ៤.៤៥ លានវ៉ុន ឬ ២ ៩៥០ ដុល្លារអាមេរិក។

គួរឱ្យដឹងផងដែរថា បច្ចុប្បន្ន Jisoo កំពុងមមាញឹកជាមួយសកម្មភាពការងារឯករាជ្យតាមរយៈទីភ្នាក់ងារ BLISSOO មិនថាក្នុងអាជីពចម្រៀង និងសម្ដែង។ សមាជិកក្រុម BLACKPINK រូបនេះ ទើបតែបង្ហាញខ្លួនក្នុងរឿងភាគ Boyfriend on Demand ដោយទទួលបានការសរសើរពីទស្សនាវដ្តី TIME ថា តួអង្គមួយនេះពិតជាស័ក្តិសមសម្រាប់ Jisoo និងបានរំលេចនូវភាពទាក់ទាញនៃរឿងមនោសញ្ចេតនាដែលមានតួឯកស្រីជាអ្នកដឹកនាំសាច់រឿង”។

ជាមួយស្នាដៃថ្មីនេះ Jisoo ក៏គ្រោងនឹងចូលរួមក្នុងមហោស្រព Canneseries Festival នៅប្រទេសបារាំង នាថ្ងៃទី ២៣ ខែមេសា ខាងមុខនេះផងដែរ ជាការបង្ហាញវត្តមានទទួលពានរង្វាន់ Madame Figaro Rising Star Award ៕