ក្រសួងវប្បធម៌កូរ៉េខាងត្បូងបានប្រកាសនៅថ្ងៃអង្គារនេះថា ខ្លួននឹងចំណាយថវិកាចំនួន ១២ ប៊ីលានវ៉ុន (ប្រហែល ៨.៦ លានដុល្លារអាមេរិក) នៅក្នុងឆ្នាំនេះ ដើម្បីផ្លាស់ប្តូររូបរាងពហុកីឡដ្ឋាន និងទីលានកីឡាពហុបំណងតាមបណ្តាខេត្ត ឱ្យទៅជាទីកន្លែងរៀបចំការប្រគំតន្ត្រី K-pop បណ្តោះអាសន្ន ដើម្បីដោះស្រាយបញ្ហាខាតកន្លែងសម្តែងដែលមានលក្ខណៈស្តង់ដារនៅក្រៅតំបន់រដ្ឋធានី។

ក្រសួងវប្បធម៌ កីឡា និងទេសចរណ៍កូរ៉េ នឹងធ្វើការជ្រើសរើសទីតាំងកីឡាតាមតំបន់ដែលមិនសូវមានសកម្មភាពចំនួន ៦ កន្លែង ដែលមានសមត្ថភាពផ្ទុកទស្សនិកជនចាប់ពី ១០០០ កៅអីឡើងទៅ ដោយជ្រើសរើស ១ កន្លែងក្នុងមួយខេត្តឬតំបន់ ក្នុងចំណោមខេត្តទាំង ៦ នៅក្រៅតំបន់ទីក្រុងសេអ៊ូល។ ទីតាំងនីមួយៗដែលត្រូវបានជ្រើសរើស នឹងទទួលបានកញ្ចប់ថវិកាឧបត្ថម្ភពីរដ្ឋាភិបាលរហូតដល់ ២ ប៊ីលានវ៉ុន ប៉ុន្តែពួកគេក៏ត្រូវស្វែងរកថវិកាបដិភាគបន្ថែមពីប្រភពផ្សេងទៀតផងដែរ។

គំនិតផ្តួចផ្តើមនេះបានលេចរូបរាងឡើង ចំពេលតន្ត្រី K-pop រីកដុះដាលយ៉ាងខ្លាំងនៅលើឆាកអន្តរជាតិ ប៉ុន្តែបែរជាជួបប្រទះនឹងបញ្ហាយ៉ាងខ្លាំងពេលរៀបចំនៅក្នុងប្រទេសខ្លួនឯង។ ខណៈ​ក្បាច់រាំដ៏រស់រវើក និង​សំឡេងតន្ត្រីដ៏ផ្ចិតផ្ចង់ត្រូវបានបង្ហាញយ៉ាងរលូននៅលើឆាកបរទេស ប៉ុន្តែការប្រគំតន្ត្រីនៅក្នុងប្រទេសកូរ៉េជារឿយៗត្រូវបានរៀបចំឡើងនៅក្នុងសាលកីឡាក្រុង ឬពហុកីឡដ្ឋានអត្តពលកម្ម ដែលខ្វះខាតប្រព័ន្ធសូរស័ព្ទមូលដ្ឋាន និងការគាំទ្រផ្នែកឆាកសម្តែងត្រឹមត្រូវ។

លោកស្រី Choi Sung-hee អគ្គនាយកនៃនាយកដ្ឋានឧស្សាហកម្មមាតិកា និងប្រព័ន្ធផ្សព្វផ្សាយរបស់ក្រសួងបានមានប្រសាសន៍ថា៖

«គម្រោងថ្មីនេះ គឺជាជំហានដំបូងដ៏សំខាន់ក្នុងការបត់បែន និងពង្រីកហេដ្ឋារចនាសម្ព័ន្ធសម្តែង ឱ្យស្របទៅនឹងឋានៈសកលនៃតន្ត្រី K-pop»។

ការកែច្នៃដែលឧបត្ថម្ភថវិកាដោយរដ្ឋាភិបាលនេះ នឹងផ្តោតលើការកែលម្អដែលមានប្រសិទ្ធភាពខ្ពស់ រួមមានការដំឡើងសម្ភារៈការពារ និងស្រូបសំឡេង កៅអីអង្គុយដែលអាចកែសម្រួលបាន ប្រព័ន្ធភ្លើងឆាកអាជីព និងបន្ទប់តុបតែងខ្លួន។ សម្រាប់ទីលានកីឡា កញ្ចប់ថវិកានេះក៏នឹងគ្របដណ្តប់លើការចំណាយសម្រាប់ប្រព័ន្ធការពារស្មៅដើម្បីធានាថាទីលានទាំងនោះអាចបង្វែរមកធ្វើជាកន្លែងរៀបចំព្រឹត្តិការណ៍កីឡាវិញបានយ៉ាងងាយស្រួល។

ដើម្បីធានាបាននូវការទទួលបានផលចំណេញមកវិញភ្លាមៗលើការវិនិយោគ ទីតាំងដែលឈ្នះការជ្រើសរើស ត្រូវបានតម្រូវឱ្យរៀបចំការប្រគំតន្ត្រីដែលមានការលក់សំបុត្រភ្លាមៗ បន្ទាប់ពីការជួសជុលកែលម្អត្រូវបានបញ្ចប់។

លើសពីការដោះស្រាយបញ្ហាឈឺក្បាលផ្នែកភស្តុភារសម្រាប់ឧស្សាហកម្មតន្ត្រី ទីក្រុងសេអ៊ូលមើលឃើញថាគម្រោងនេះគឺជាកាតាលីករសេដ្ឋកិច្ចមួយ។ មន្ត្រីរដ្ឋាភិបាលសង្ឃឹមថា ការបង្កើតទីតាំងសម្តែងដែលមានគុណភាពខ្ពស់នៅតាមបណ្តាខេត្ត នឹងជួយកាត់បន្ថយការប្រមូលផ្តុំវប្បធម៌តែនៅក្នុងទីក្រុងធំ ទាក់ទាញភ្ញៀវទេសចរបរទេសឱ្យធ្វើដំណើរទៅកាន់តំបន់ជនបទកាន់តែជ្រៅ និងជួយជំរុញសេដ្ឋកិច្ចក្នុងតំបន់ឱ្យមានភាពរស់រវើក។

កំលុងពេលនេះ ក្រសួងនឹងបើកទទួលពាក្យសុំពីសំណាក់រដ្ឋបាលក្នុងតំបន់ ក្រុមហ៊ុនសាធារណៈ និងសាកលវិទ្យាល័យនានា រហូតដល់ថ្ងៃទី ២៤ ខែកក្កដាខាងមុខនេះ ៕