ជោគជ័យនៃបទចម្រៀង “Golden” នៅក្នុងកម្មវិធីប្រគល់ពានរង្វាន់ Academy Awards (Oscars) ឆ្នាំ ២០២៦ បានកត់សម្គាល់នូវកំណត់ត្រាជាប្រវត្តិសាស្ត្រសម្រាប់ឧស្សាហកម្ម K-pop លើឆាកអន្តរជាតិ។ ខ្សែភាពយន្តគំនូរជីវចលរឿង “KPop Demon Hunters” បានឈ្នះពានរង្វាន់ភាពយន្តគំនូរជីវចលល្អបំផុត ខណៈដែលបទចម្រៀង Soundtrack គឺបទ “Golden” បានឈ្នះពានរង្វាន់បទចម្រៀងដើមល្អបំផុត (Best Original Song) ដែលធ្វើឱ្យវាក្លាយជាបទចម្រៀង K-pop ដំបូងគេបំផុតដែលបានឈ្នះ​ពានរង្វាន់នេះនៅឯកម្មវិធី Oscars។

មុនពេលឈ្នះពានរង្វាន់ Oscar បទ “Golden” ក៏បានឈ្នះពានរង្វាន់បទចម្រៀងល្អបំផុតដែលសរសេរសម្រាប់ប្រព័ន្ធផ្សព្វផ្សាយរូបភាព (Best Song Written for Visual Media) ក្នុងកម្មវិធី Grammy Awards ឆ្នាំ ២០២៦ និងទទួលបានការទទួលស្គាល់ក្នុងកម្មវិធី Golden Globe Awards ផងដែរ។ សមិទ្ធផលដ៏កម្រនេះបានធ្វើឱ្យ “Golden” បានជាប់ក្នុងចំណោមបទចម្រៀងភាពយន្តតែប៉ុន្មានបទប៉ុណ្ណោះក្នុងប្រវត្តិសាស្ត្រ ដែលត្រូវបានផ្តល់កិត្តិយសដោយស្ថាប័នកំពូលទាំងផ្នែកភាពយន្ត និងតន្ត្រី។

នៅពីក្រោយជោគជ័យនៃបទ “Golden” គឺលោក Teddy Park ​ផលិតករតន្ត្រីម្នាក់ដែលត្រូវបានគេទទួលស្គាល់យ៉ាងទូលំទូលាយថាជាបុគ្គល​មានឥទ្ធិពលបំផុតនៅក្នុងឧស្សាហកម្ម K-pop។

មុនពេលក្លាយជាផលិតករកំពូល លោក Teddy បានបង្ហាញខ្លួនដំបូង (Debut) នៅចុងទសវត្សរ៍ឆ្នាំ ១៩៩០ ជាសមាជិកក្រុមហ៊ីបហប 1TYM ក្រោមការគ្រប់គ្រងរបស់ផលិតកម្ម YG Entertainment។ អំឡុងពេលនៅក្នុងក្រុម លោកមិនត្រឹមតែជាអ្នកសម្តែងប៉ុណ្ណោះទេ ប៉ុន្តែក៏បានចូលរួមក្នុងការសរសេរបទចម្រៀង និងផលិតតន្ត្រីផងដែរ។ បទពិសោធន៍នេះបានជួយឱ្យលោកយល់ដឹងយ៉ាងស៊ីជម្រៅអំពីដំណើរការបង្កើតតន្ត្រីទាំងមូល ចាប់តាំងពីការថតនៅក្នុងស្ទូឌីយោ រហូតដល់ការបញ្ជូនទៅកាន់អ្នកស្ដាប់។

បន្ទាប់ពីក្រុម 1TYM បានផ្អាកសកម្មភាពជាបណ្តើរៗនៅប្រហែលឆ្នាំ ២០០៦ លោក Teddy បានប្តូរមកធ្វើជាផលិតករទាំងស្រុង។ មិនយូរប៉ុន្មាន លោកបានចូលរួមក្នុងការបង្កើតតន្ត្រីឱ្យសិល្បករធំៗរបស់ YG ដូចជា Se7en និង BIGBANG ដែលជួយកសាងកេរ្តិ៍ឈ្មោះរបស់លោកនៅក្នុងឧស្សាហកម្មតន្ត្រីកូរ៉េ។

អាជីពរបស់លោកបានឈានដល់ចំណុចរបត់ដ៏សំខាន់មួយទៀត នៅពេលដែលលោកបានក្លាយជាផលិតករមេសម្រាប់ក្រុម 2NE1។ បទចម្រៀងជាច្រើនរបស់ក្រុមនេះបានទទួលជោគជ័យ​យ៉ាងខ្លាំង រួមទាំងបទ “I Don’t Care” ដែលបានឈ្នះពានរង្វាន់ Daesang នៅក្នុងកម្មវិធី Mnet Asian Music Awards ឆ្នាំ ២០០៩។

ក្នុងឆ្នាំ ២០១៦ លោក Teddy បានដើរតួនាទីយ៉ាងសំខាន់ក្នុងការរៀបចំស្ទីលតន្ត្រីរបស់ក្រុម BLACKPINK តាំងពីការចាប់ផ្តើមដំបូង។ លោកបានផលិតបទចម្រៀងល្បីៗកម្រិតសកលជាច្រើនសម្រាប់ក្រុមនេះ រួមមានបទ “Whistle”, “BOOMBAYAH”, “DDU-DU DDU-DU”, “Kill This Love” និង “How You Like That”។ សម្រាប់អ្នកគាំទ្រជាច្រើន ភាពជោគជ័យរបស់ BLACKPINK គឺផ្សារភ្ជាប់យ៉ាងជិតស្និទ្ធទៅនឹងស្ទីលផលិតដ៏ប្លែករបស់លោក Teddy។

ក្រៅពីការផលិតតន្ត្រី លោក Teddy ក៏ជាបុគ្គលសំខាន់ក្នុងអាជីវកម្មកម្សាន្តផងដែរ។ ក្នុងឆ្នាំ ២០១៥ លោកបានរួមគ្នាបង្កើតផលិតកម្ម The Black Label ជាមួយផលិតករ Kush។ ក្រោយមក ក្រុមហ៊ុននេះបានក្លាយជាផលិតកម្មឯករាជ្យដ៏មានឥទ្ធិពលមួយដែលគ្រប់គ្រងសិល្បករល្បីៗជាច្រើនដូចជា Jeon Somi, Taeyang និង Park Bo-gum ព្រមទាំងធ្វើការជាមួយ​ Rosé សម្រាប់សកម្មភាពទោលរបស់នាងផងដែរ។

ផលិតកម្មនេះបានបន្តពង្រីកឥទ្ធិពលរបស់ខ្លួន ដោយបានបញ្ចេញក្រុមចម្រៀងថ្មីៗដូចជា MEOVV និង ALLDAY PROJECT ក្នុងរយៈពេលប៉ុន្មានឆ្នាំចុងក្រោយនេះ។

លើសពីនេះទៅទៀត ការរួមចំណែករបស់លោក Teddy ក៏ត្រូវបានទទួលស្គាល់ជាអន្តរជាតិផងដែរ។ ក្នុងឆ្នាំ ២០២១ ទស្សនាវដ្តី Billboard បានដាក់បញ្ចូលរូបលោកទៅក្នុងបញ្ជីផលិតករតន្ត្រីឆ្នើមបំផុតទាំង ៥០ នៃសតវត្សរ៍ទី ២១។

ទោះបីជាមានឥទ្ធិពលយ៉ាងខ្លាំងក្លាក៏ដោយ លោក Teddy ត្រូវបានគេស្គាល់ថាជាមនុស្សដែលរក្សាជីវិតឯកជន និងមិនសូវបង្ហាញមុខជាសាធារណៈឡើយ។ លោកកម្រផ្តល់បទសម្ភាសន៍ ជៀសវាងការប្រើប្រាស់បណ្តាញសង្គម និងជាទូទៅចូលចិត្តនៅពីក្រោយឆាក ដោយបង្ហាញខ្លួនម្តងម្កាលតែនៅក្នុងរូបថតជាមួយសិល្បករតែប៉ុណ្ណោះ។

ជាមួយនឹងជោគជ័យជាសកលនៃបទ “Golden” ទាំងនៅក្នុងកម្មវិធី Grammy និង Oscar ដំណើរការជាងពីរទសវត្សរ៍របស់លោក Teddy Park ក្នុងការផលិតតន្ត្រីបានទាក់ទាញការចាប់អារម្មណ៍ម្តងទៀត ដែលបានបញ្ជាក់បន្ថែមនូវកេរ្តិ៍ឈ្មោះរបស់លោកថាជាបុគ្គលដ៏មានអំណាចបំផុតម្នាក់ ប៉ុន្តែមានភាពសាមញ្ញ និងស្ងប់ស្ងាត់បំផុតនៅក្នុងវិស័យ K-pop ៕