The Zero Project កាន់តែទទួលបានការចាប់អារម្មណ៍ខ្លាំងឡើងៗ ខាងសារព័ត៌មានកូរ៉េចុះផ្សាយមិនឈប់

កម្មវិធី Reality Survival របស់កូនខ្មែរ The Zero Project កំពុងល្បីរន្ទឺ ចាប់តាំងពីដំណើរការដំបូងនាខែមីនា ឆ្នាំ ២០២៦ រហូតមកដល់ពេលនេះ ដំណើរការជាង ២ ខែហើយ និងជ្រើសរើសបានបេក្ខភាពមានសមត្ថភាពជាង ១០ រូប។ ក្រោយចម្រាញ់បាន Trainees ១២ រូប The Zero Project កាន់តែល្បី រហូតស្ថាប័នព័ត៌មានកូរ៉េជាច្រើនចុះផ្សាយ។

The Zero Project ទទួលបានការចាប់អារម្មណ៍ខ្លាំមិនមែនទើបតែថ្មីៗនេះទេ។ ពោលតាំងពីចាប់ផ្ដើមប្រកាសភ្លាមៗ ក៏ត្រូវបានសារព័ត៌មានរបស់ប្រទេសកូរ៉េខាងត្បូងល្បីៗចុះផ្សាយព្រោងព្រាត និងសរសើរពីការរៀបចំបាត់ទៅហើយ។ ថ្មីៗនេះទៀតស្ថាប័នព័ត៌មានកូរ៉េ NC PRESS KOREA , nc.press, Stardaily News និងប្រព័ន្ធផ្សព្វផ្សាយកូរ៉េជាច្រើនទៀត បន្តនិយាយពីកម្មវិធីនេះ។

ខ្លឹមសារនៃអត្ថបទដែលសារព័ត៌មានកូរ៉េចុះផ្សាយពី The Zero Project ដោយផ្ដោតលើ Trainees ដែលត្រៀមបង្ហាញមុខជាលើកដំបូងនៅលើឆាក «Trainees Reveal Stage» ដោយ «Trainees Reveal Stage» នឹងចាប់ផ្ដើមឡើងនៅថ្ងៃ ៣១ ខែឧសភា ឆ្នាំ ២០២៦ ខាងមុខនេះ នៅផ្សារទំនើប ជីប ម៉ុង ២៧១ មេហ្គាម៉ល។

The Zero Project របស់កូនខ្មែរបាននាំយកគ្រូបង្វឹកមកពីប្រទេសកូរ៉េក្នុងនោះមានមកពីផលិតកម្ម SM Entertainment មកបង្ហាត់ Trainees ទាំង ១២។ វាពិតជាមានមោទនភាពខ្លាំងណាស់ដែលកម្ពុជាអាចផលិតកម្មវិធីលំដាប់បែបនេះបាន ហើយធ្វើឲ្យអន្តរជាតិស្គាល់ច្បាស់ CAMPOP កម្ពុជា។

តាំងពីថ្ងៃប្រកាសចាប់ផ្ដើមរហូតមក The Zero Project ធ្វើឲ្យមហាជនមើលឃើញយ៉ាងច្បាស់ថា កម្មវិធីនេះនឹងធ្វើឲ្យកេរ្តិ៍ឈ្មោះកម្ពុជាលើឆាកអន្តរជាតិត្រូវបានស្គាល់ច្បាស់បន្ថែមទៀត ហើយក៏ជាក្ដីសង្ឃឹមដើម្បីឲ្យពិភពលោកបានស្គាល់ពីឧស្សាហកម្មតន្ត្រីប៉ុបនៃកម្ពុជា។ បន្ទាប់ពីរកឃើញជើងខ្លាំងទាំង ១២ នៃ The Zero Project ខាងអ្នករៀបចំកម្មវិធីបានបង្ហាញក្ដីរំភើប ព្រោះមើលឃើញពីសម្រស់ សមត្ថភាពកូនខ្មែរ គឺមានភាពប្រកួតប្រជែងខ្ពស់ និងស្ថិតនៅក្នុងកម្រិតស្ដង់ដាមិនចាញ់ប្រទេសណាមួយឡើយ។

គួរបញ្ជាក់ថា The Zero Project បានជួយឲ្យបេក្ខភាពដែលមានទេពកោសល្យ និងសមត្ថភាព អាចឈានទៅសម្រេចក្ដីស្រមៃខ្លួនបាន។ កម្មវិធីដែលផលិតដោយកូនខ្មែរ ហើយសហការជាមួយគ្រូបង្វឹក ព្រមទាំងអ្នកជំនាញពីកូរ៉េ ក៏មានគ្រូបង្វឹកខ្មែរដ៏មានសមត្ថភាពព្រមទាំងឈរជើងក្នុងវិស័យសិល្បៈខ្មែរជាច្រើនឆ្នាំ ទទួលបានការគាំទ្រខ្លាំងលើសលប់ បើទោះជាទើបផលិតលើកដំបូងក៏ដោយ៕