ថុល សុភិទិ និងគូស្នេហ៍ ផ្ញើថវិកាជួយលោកយាយកម្សត់ ដែលត្រូវអ្នករត់កង់បីបោកប្រាស់

កាលពីម្សិលមិញ លោកយាយវ័យ ៨០ ឆ្នាំម្នាក់ ត្រូវអ្នករត់ម៉ូតូកង់បីប្រើល្បិចធ្វើជាខូចម៉ូតូ ហើយបានដឹកយកផ្លែឈើដែលម៉ូយកុម្ម៉ង់ចេញទៅបាត់ស្រមោល ដោយបន្សល់ទុកលោកយាយកំព្រាឱ្យអង្គុយរង់ចាំកណ្ដាលថ្ងៃក្ដៅ ទាំងឈឺចាប់ក្នុងចិត្ត។

រឿងរ៉ាវដ៏សែនកម្សត់របស់លោកយាយ ដែលជាអ្នកលក់ផ្លែឈើនៅក្នុងផ្សារអូឡាំពិក ត្រូវអ្នករត់កង់បីប្រើល្បិចបោកប្រាស់ ធ្វើជាខូចម៉ូតូ ដេរមិនឆេះ និងបានសុំឱ្យលោកយាយចុះ ដើម្បីខ្លួនបានសាកដេរជាថ្មីម្ដងទៀត ជាអកុសល ម្ចាស់កង់បីនោះក៏បានបរចេញយ៉ាងលឿន ហើយបានដឹកយកទាំងផ្លែឈើ ដែលម៉ូយបានកុម្ម៉ង់ គិតជាទឹកប្រាក់ជាង ២០ ម៉ឺនរៀល ចេញទៅបាត់ស្រមោល។

ក្រោយមានការចែករំលែកសុះសាយនៃដំណឹងមួយនេះ មហាជនអ្នកប្រើប្រាស់បណ្ដាញសង្គមកើតចិត្តក្ដុកក្ដួល នឹកអាណិតដល់លោកយាយជាពន់ពេក។ ជាមួយគ្នា តារាចម្រៀង ថុល សុភិទិ គូស្នេហ៍អ្នកនាង ឡុង សុមានីន បានស្វះស្វែងរកមធ្យោបាយដើម្បីទំនាក់ទំនង ដើម្បីជូនថវិកាដល់លោកយាយ ជាទុនដើម្បីបន្តការរកស៊ី ក្នុងចំនួន ៨០ ម៉ឺនរៀល តាមរយៈក្រុមការងារ ហើយទឹកប្រាក់នោះដែរ គឺបានដល់ដៃលោកយាយទាំងយប់តែម្ដង។

គួរឱ្យដឹងថា បច្ចុប្បន្នលោកយាយកំព្រា រស់នៅភូមិដើមចារ ខ២ ច្រាំងចំរេះ គីឡូម៉ែត្រលេខ៧ និងមានចៅក្នុងបន្ទុកផងដែរ។ ចំណែកឯរឿងរ៉ាវដែលបានកើតឡើងកាលពីម្សិលមិញ ពោលគឺថ្ងៃទី ២៥ ខែ មីនា ឆ្នាំ ២០២៦ គឺនៅម្ដុំផ្សារគីឡូម៉ែត្រលេខ៦ ត្រង់ចំណុចទីតាំងនៃស្ថានីយទូរទស្សន៍ប៉ុស្តិ៍ CTN ។

ក្រោយកើតហេតុ លោកយាយបានធ្វើទាក់ទងមកកាន់ ABC និងបានផ្ដល់បទសម្ភាសដោយផ្ទាល់នូវបទពិសោធន៍ឈឺចាប់ដែលបានកើតឡើងលើលោកយាយ ក្នុងគោលបំណងឱ្យម្ចាស់កង់បីបានឃើញនូវទង្វើ គ្មានធម៌មេត្តារបស់ខ្លួន ក៏ដូចជាផ្ដល់សារឱ្យមហាជនបង្កើនការប្រុងប្រយ័ត្ន ខ្លាចជួបករណីដូចគាត់៕

វីដេអូទី១៖https://www.facebook.com/share/v/1ZptzDfBdU/

វីដេអូទី២៖ https://www.facebook.com/share/v/18f1dfUjjr/

រូបភាព ៖ ថុល សុភិទិ

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។