Tom Holland បានចែករំលែកពីចក្ខុវិស័យរបស់លោកនាពេលអនាគតសម្រាប់តួអង្គ Spider-Man ដោយយល់ថា តារាជំនាន់ប្អូន Owen Cooper ស័ក្តិសមនឹងទទួលបានឱកាសសម្ដែងជាតួអង្គវីរបុរសមួយនេះបន្តពីលោក។

នៅក្នុងបទសម្ភាសន៍ថ្មីមួយជាមួយទស្សនាវដ្ដី Esquire ចេញផ្សាយនៅថ្ងៃទី១៦ ខែមិថុនា នេះ តារាប្រុសវ័យ ៣០ ឆ្នាំ បានឱ្យដឹងថា លោកមានគំនិតរួចជាស្រេចហើយថា តើនរណាដែលអាចមកដើរតួជា Peter Parker បន្ទាប់ពីលោក។

ជាក់ស្ដែង Tom Holland បានលើកឈ្មោះរបស់តារាជំនាន់ប្អូនរូបនោះថា៖ “Owen Cooper ពិតជាអស្ចារ្យណាស់។ តាមពិតទៅ គេជាមនុស្សដែលមានទេពកោសល្យខ្ពស់ ហើយបច្ចុប្បន្នកំពុងតែល្បីខ្លាំង ដែលមានមនុស្សនិយាយពីគេច្រើន”។

Owen Cooper គឺជាតួឯកប្រុសពីខ្សែភាពយន្តភាគរឿង Adolescence ដោយការសម្ដែងនៅក្នុងភាពយន្តភាគខ្លីរបស់ Netflix មួយនេះ បានធ្វើឱ្យតារាប្រុសវ័យ ១៦ ឆ្នាំ ទទួលបានពានរង្វាន់កោតសរសើរជាច្រើន ពីកម្មវិធីល្បីៗដូចជា BAFTA TV Awards, Critics Choice Awards, Golden Globes និង Primetime Emmy Awards ជាដើម។

បន្ទាប់ពីទទួលបានជោគជ័យក្នុងរឿង Adolescence មក Owen Cooper នឹងបង្ហាញសមត្ថភាពសម្ដែងបន្ថែមទៀត តាមរយៈភាពយន្តកុនចំនួន ២រឿង គឺ​ Wuthering Heights រឿង Cry to Heaven និងភាពយន្តភាគចំណងជើង Film Club។

ត្រឡប់ទៅកាន់បទសម្ភាសន៍ដើមវិញ ស្វាមីរបស់តារាស្រី Zendaya ក៏បានបង្ហាញពីគោលបំណងក្នុងការចូលរួមអភិវឌ្ឍតួអង្គ Spider-Man សម្រាប់ភាពយន្តបន្តបន្ទាប់ទៀតដែរ បើទោះបីជាគ្រានោះលោកអស់តួនាទីត្រូវសម្ដែងជាតួអង្គនេះក៏ដោយ។

រំឭកដល់រៀមច្បង Robert Downey Jr. ដែលបានជួយបង្វឹក និងណែនាំលោកនៅពេលសម្ដែងជាតួអង្គ Spider-Man ដំបូង Tom Holland បាននិយាយថា៖ “ដូចដែល Robert Downey ធ្លាប់ធ្វើជាអ្នកណែនាំដ៏ល្អម្នាក់សម្រាប់ខ្ញុំនៅក្នុងខ្សែភាពយន្តបីវគ្គដំបូងអ៊ីចឹង ខ្ញុំក៏ចង់ធ្វើរឿងតែមួយនេះដូចគ្នា សម្រាប់អ្នកដែលនឹងមកបន្តវេនពីខ្ញុំ”។

គួរឱ្យដឹងផងដែរថា Tom Holland គឺជាតារាសម្តែងទី ៣ ដែលទទួលបានឱកាសសម្ដែងជាតួអង្គ Spider-Man បន្ទាប់ពីរៀមច្បងទាំងពីរគឺ Tobey Maguire និង Andrew Garfield។

ចាប់តាំងពីការបង្ហាញខ្លួនជាលើកដំបូងក្នុងឆ្នាំ ២០១៦ តាមរយៈខ្សែភាពយន្តរឿង Captain America: Civil War តារាសម្ដែងហូលីវូដរូបនេះបានបន្តសម្ដែងក្នុងរឿង Spider-Man ចំនួន ៣ ភាគរួចមកហើយ ខណៈភាពយន្តវគ្គថ្មីទី ៤ Spider-Man: Brand New Day កំពុងត្រៀមចូលរោងចាក់បញ្ចាំងនៅខែ កក្កដា ខាងមុខនេះ៕