តារាសម្តែងហុងកុង Bosco Wong បានទម្លាយឱ្យដឹងថា លោកគ្មានបំណងនឹងរៀបការនោះទេ ដោយបានពន្យល់ថា ទស្សនៈរបស់លោកចំពោះទំនាក់ទំនងស្នេហា និងគ្រួសារ ត្រូវបានជះឥទ្ធិពលយ៉ាងជ្រៅពីបទពិសោធន៍ក្នុងវ័យកុមារភាព។ ក្នុងវ័យ ៤៥ ឆ្នាំ តារាឆ្នើមប្រចាំប៉ុស្តិ៍ TVB រូបនេះ បាននិយាយថា លោកមិនមានសម្ពាធក្នុងការចង់បានកូននោះទេ ហើយកំពុងរីករាយជាមួយរបៀបរស់នៅបច្ចុប្បន្នរបស់លោកយ៉ាងពេញទំហឹង។

យោងតាមសារព័ត៌មានចិន Sohu បានឱ្យដឹងថា កាលពីពេលថ្មីៗនេះ តារាប្រុស Bosco Wong បានបង្ហាញខ្លួននៅក្នុងកម្មវិធីសម្ភាសន៍មួយ ដែលលោកបានជជែកពិភាក្សាយ៉ាងស្មោះត្រង់អំពីគំនិតរបស់លោកចំពោះរឿងស្នេហា និងអាពាហ៍ពិពាហ៍។ ក្នុងអំឡុងពេលនៃការសន្ទនានោះ តារាសម្តែងរូបនេះបានអះអាងយ៉ាងម៉ឺងម៉ាត់ថា លោកមិនដែលចាត់ទុកអាពាហ៍ពិពាហ៍ជាផ្នែកមួយនៃអនាគតរបស់លោកឡើយ។

លោកបានពន្យល់ថា ការសម្រេចចិត្តរបស់លោកមានទំនាក់ទំនងយ៉ាងជិតស្និទ្ធទៅនឹងប្រវត្តិគ្រួសារ។ លោកបានកើតនៅក្នុងគ្រួសារដែលបាក់បែក ដោយឪពុកម្តាយរបស់លោកបានលែងលះគ្នាបន្ទាប់ពីលោកកើតបានមិនយូរប៉ុន្មាន។ ការធំធាត់ឡើងដោយគ្មានបរិយាកាសគ្រួសារជុំគ្នាបានបន្សល់ទុកឱ្យលោកនូវការយល់ខុសប្លែកទាំងស្រុងអំពីសុភមង្គលគ្រួសារ។ លោកបានសារភាពថា លោកមិនដែលបង្កើតឱ្យមានការពឹងផ្អែកផ្លូវចិត្តយ៉ាងខ្លាំងក្លាទៅលើឪពុកម្តាយ ដូចដែលមនុស្សជាច្រើនធ្លាប់បានឆ្លងកាត់នោះទេ។

ជាលទ្ធផល តារាសម្តែងរូបនេះជឿជាក់ថា ជីវិតបច្ចុប្បន្នរបស់លោកមានភាពពេញលេញរួចទៅហើយ។ ក្នុងទស្សនៈរបស់លោក ការរៀបការ និងការចិញ្ចឹមបីបាច់ថែរក្សាកូនៗ នឹងនាំមកនូវការទទួលខុសត្រូវ និងសម្ពាធថ្មីៗ ជាពិសេសគឺការប្រឈមមុខផ្សេងៗដែលមកជាមួយតួនាទីជាអាណាព្យាបាល។

បច្ចុប្បន្នមានអាយុ ៤៥ ឆ្នាំ និងនៅលីវយ៉ាងបើកចំហ លោក Bosco Wong ទទួលស្គាល់ថា មនុស្សជាច្រើនចាត់ទុកគ្រួសារដ៏ធំមួយថាជាប្រភពនៃសុភមង្គលដ៏អស្ចារ្យបំផុត។ ទោះយ៉ាងណា លោកមើលឃើញរឿងនេះក្នុងផ្លូវផ្សេងវិញ។ សម្រាប់រូបលោក ការទទួលយកជីវិតនៅលីវ និងការធ្វើឱ្យរាល់ថ្ងៃនៃបច្ចុប្បន្នកាលមានតម្លៃបំផុត គឺជារឿងសំខាន់ជាងការដើរតាមការរំពឹងទុករបស់សង្គម។

ជាមួយនឹងរូបរាងដ៏ស្រស់សង្ហា និងអាជីពសម្តែងដ៏ជោគជ័យ Bosco Wong ត្រូវបានគេចាត់ទុកជាយូរមកហើយថាជាម្នាក់ក្នុងចំណោមបុរសនៅលីវដែលគួរឱ្យប្រាថ្នាបំផុតនៅក្នុងវិស័យកម្សាន្តហុងកុង។ ជាច្រើនឆ្នាំកន្លងមកនេះ លោកបានកសាងកេរ្តិ៍ឈ្មោះយ៉ាងរឹងមាំតាមរយៈរឿងភាគទូរទស្សន៍ ការថតផ្សាយពាណិជ្ជកម្ម និងការបង្ហាញខ្លួននៅក្នុងព្រឹត្តិការណ៍ធំៗ។ ជោគជ័យរបស់លោកនៅចិនដីគោក ត្រូវបានរាយការណ៍ថា បានជួយឱ្យលោកសន្សំបាននូវទ្រព្យសម្បត្តិយ៉ាងច្រើនសន្ធឹកសន្ធាប់។

ទោះបីជាមានភាពជោគជ័យផ្នែកហិរញ្ញវត្ថុក៏ដោយ លោកនៅតែរក្សាអាកប្បកិរិយាធូរស្រាលចំពោះរឿងលុយកាក់។ លោកជឿជាក់ថា ទ្រព្យសម្បត្តិគួរតែត្រូវបានប្រើប្រាស់ដើម្បីបង្កើតក្តីសុខ ជាងការអង្គុយសន្សំវាមិនចេះចប់មិនចេះហើយ។ ដោយសារតែលោកគ្មានផែនការទុកមរតកឱ្យកូនចៅ លោកមានអារម្មណ៍មានសេរីភាពក្នុងការចំណាយលើរបស់ដែលលោកស្រឡាញ់ដោយគ្មានការរារែកចិត្តឡើយ។

គួរបញ្ជាក់ថា Bosco Wong ក៏ធ្លាប់មានទំនាក់ទំនងស្នេហាបើកចំហរខ្លះដែរនាពេលកន្លងមក ប៉ុន្តែចំណងស្នេហ៍ ៨ឆ្នាំរបស់លោកជាមួយតារាសម្តែងស្រី Myolie Wuនៅតែជារឿងដែលល្បីល្បាញបំផុត។ អ្នកទាំងពីរធ្លាប់ត្រូវបានគេចាត់ទុកថាជាគូស្នេហ៍ដ៏គួរឱ្យស្រឡាញ់បំផុតមួយគូនៅក្នុងវិស័យកម្សាន្តហុងកុង។ ទោះជាយ៉ាងណាក៏ដោយ ទំនាក់ទំនងរបស់ពួកគេបានឈានដល់ទីបញ្ចប់ ដោយកាលណោះ Myolie Wu ត្រូវបានគេដឹងថាបានស្រក់ទឹកភ្នែកយ៉ាងខ្លាំង ពេលនិយាយជាសាធារណៈអំពីការបែកបាក់នោះ។

បន្ទាប់ពីការបែកបាក់ពី Bosco Wong មក Myolie Wu បានស្វែងរកឃើញសុភមង្គលម្តងទៀត ហើយក្រោយមកបានរៀបការជាមួយអ្នកជំនួញម្នាក់គឺលោក Philip Lee។ បច្ចុប្បន្ន គូស្វាមីភរិយាមួយគូនេះមានកូនប្រុស ៣ នាក់ និងទទួលបានការកោតសរសើរយ៉ាងខ្លាំងចំពោះជីវិតគ្រួសារដ៏កក់ក្តៅ និងមានស្ថិរភាព ៕