វណ្ណដា ទៅដល់ណាក៏ក្មេងៗចោលរោមទទួលរាក់ទាក់ ស្រលាញ់មិនប្រែ

មួយរយៈនេះកំពូលតារារ៉េប វណ្ណដា រៀងស្ងប់ស្ងាត់បន្តិចពីការចេញបទចម្រៀងថ្មី និងការសម្ដែងផ្សេងៗ។ ដោយលោកផ្ដោតលើការសម្រាក និងដើរលំហែច្រើនជាមួយមិត្តភ័ក្តិនៅតាមបណ្ដាខេត្តនានា ពិសេសគឺខេត្តដែលមានសមុទ្រ និងព្រៃភ្នំ។

បន្ទាប់ពីសម្រាកហើយ ម្ចាស់បទ «ជយបជុំ» បានវិលមកការងារវិញ ដោយចាប់ផ្ដើមពីការការងារសប្បុរស នាំយកថវិកា និងសម្ភារមួយចំនួនទៅជូនអង្គការដើម្បីភាពញញឹមនៃកុមារ (PSE)។ កាលពីថ្ងៃ ២៨ ខែឧសភា ឆ្នាំ ២០២៦ អង្គការដើម្បីភាពញញឹមនៃកុមារ បានទទួលស្វាគមន៍ កំពូលតារារ៉េបដ៏ល្បីល្បាញ ម៉ាន់ វណ្ណដា និងក្រុមការងារ យ៉ាងសប្បាយរីករាយ។

វណ្ណដា បានធ្វើឲ្យក្មេងៗនៅ PSE ញញឹមបិទបាត់មិនជិតឡើយ ហើយបានចោមរោមម្ចាស់បទ «DECADE OF LOVE» ខ្លះឱប ខ្លះដើរតាមពីក្រោយ។ កុមារតូចៗដែលជាសិស្សានុសិស្សទទួលបានអារម្មណ៍កក់ក្ដៅ និងមានស្នាមញញឹមជាប់ ព្រោះបានជួបយ៉ាងជិតស្និទ្ធជាមួយកំពូលតារាចម្រៀងជួរមុខនៃប្រទេសកម្ពុជារូបនេះ។

វណ្ណដា បាននាំយកជំនួយសប្បុរសធម៌ដែលទទួលបានមកពីក្រុមហ៊ុន យូនីលឹវើ កម្ពុជា ក្លៀវមែន ពីការប្រគំតន្ត្រីសរុបជាថវិកាប្រមាណ៤០លានរៀល ត្រូវបានប្រគល់ជូនដល់ អង្គការដើម្បីភាពញញឹមនៃកុមារ។ មិនមែនតែក្មេងៗឡើយបុគ្គលិកនៅទីនោះ ក៏បង្ហាញការរំភើបដែរ។

អង្គការដើម្បីភាពញញឹមនៃកុមារ បានអំណរគុណយ៉ាងជ្រាលជ្រៅដល់ វណ្ណដា ក្រុមការងារ និងផលិតកម្មបារមី សម្រាប់កម្មវិធីសប្បុរសធម៌ដ៏មានអត្ថន័យមួយនេះ។ នេះជាការរួមចំណែកជួយគាំទ្រដល់ សិស្សានុសិស្សដែលមកពីក្រុមគ្រួសារក្រីក្រ ដែលកំពុងសិក្សានៅក្នុងអង្គការដើម្បីភាពញញឹមនៃកុមារ ឲ្យចាកចេញពីទុក្ខវេទនាទៅកាន់ការងារអាជីព តាមរយៈការអប់រំ ការបណ្ដុះបណ្ដាលជំនាញវិជ្ជាជីវៈ ជាពិសេសផ្ដោតសំខាន់ទៅលើកម្មវិធីសិក្សាជំនាញវគ្គខ្លី (ជំនាញរចនាម៉ូតសក់ និងសម្រស់)៕

រូបភាព៖ PSE – Pour un Sourire d’Enfant – Cambodia និង Baramey Production

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត

វណ្ណដា ទៅដល់ណាក៏ក្មេងៗ​ចោលរោមទទួលរាក់ទាក់ ស្រលាញ់មិនប្រែ

អ្នកនាង ទ្រី រ៉ាវី | Ms. Try Ravy

វណ្ណដា ទៅដល់ណាក៏ក្មេងៗចោលរោមទទួលរាក់ទាក់ ស្រលាញ់មិនប្រែ