បងប្អូនជីដូនមួយរបស់ Seulgi សមាជិកក្រុម Red Velvet និងជាម្ចាស់គណនី YouTube ឈ្មោះ Susanna បានទទួលមរណភាពក្នុងវ័យ ៣០ ឆ្នាំ កាលពីថ្ងៃទី ៧ ខែមិថុនា កន្លងទៅ ដោយបានបន្សល់ទុកវីដេអូចុងក្រោយរួមគ្នា។

នៅថ្ងៃទី ១១ ខែមិថុនា នេះ បុគ្គលម្នាក់ដែលបានណែនាំខ្លួនថាជាបងប្អូនជីដូនមួយរបស់ Susanna បានចែករំលែកដំណឹងមរណភាពនេះ តាមរយៈ Comment នៅពីក្រោមវីដេអូ YouTube របស់ Susanna ថា៖ “បេះដូងខ្ញុំសោកសៅណាស់ ក្នុងការចែករំលែកដំណឹងសោកនាដកម្មនេះទៅកាន់អ្នករាល់គ្នា ដែលធ្លាប់ស្រឡាញ់ និងគាំទ្រ Susanna”។

បងប្អូនជីដូនមួយរូបនេះបានចែករំលែកបន្ថែមថា Susanna បានទទួលមរណភាពកាលពីថ្ងៃទី ៧ ខែមិថុនា ដោយមានក្រុមគ្រួសារ និងមិត្តភក្តិនៅក្បែរនាងរហូតដល់ដង្ហើមចុងក្រោយ។ បុគ្គលដដែលនោះបានបន្តថា៖ “ខ្ញុំសូមស្នើសុំឱ្យអ្នកដែលធ្លាប់ស្រឡាញ់ពេញចិត្ត YouTube របស់ Susanna ចូលរួមរំលែកទុក្ខ និងបួងសួងដល់នាងផង”។

គួរឱ្យដឹងផងដែរ កាលពីថ្ងៃទី ២៩ ខែឧសភា កន្លងទៅ Susanna បានបង្ហោះវីដេអូរួមគ្នាជាមួយបងស្រីជីដូនមួយ Seulgi ក្រោមចំណងជើងថា៖ «(ណែនាំមិត្តខ្ញុំ) មិនមែន Seulgi សមាជិក Red Velvet ទេ តែម្នាក់នេះជាបងស្រីខ្ញុំ Kang Seulgi”។​ ខណៈនេះជាវីដេអូចុងក្រោយនៅលើ YouTube របស់ Suanna៕