ក្រុមស្ថាបត្យករកម្ពុជា ឈ្នះពានរង្វាន់ពីកម្មវិធី Asia Architecture Design Awards 2026

ក្រុមហ៊ុន GUBIC + PARTNERS ដែលជាក្រុមហ៊ុនស្ថាបត្យកម្មមួយនៅប្រទេសកម្ពុជាបានចូលរួមក្នុងកម្មវិធី Asia Architecture Design Awards ២០២៦ ដែលរៀបចំកាលពីថ្ងៃ ២៦ ខែមិថុនា ឆ្នាំ ២០២៦ កន្លងទៅ នៅ Dragon Pearl Cave ខេត្តក្វាងនិញ ប្រទេសវៀតណាម។

ជាមោទនភាព GUBIC + PARTNERS ឈ្នះពានរង្វាន់ Asia Architecture Design Awards ក្នុងផ្នែក Asia’s Best Conceptual Interior Design សម្រាប់គម្រោង GUBIC Headquarters។ សមិទ្ធផលនេះ គឺជាការទទួលស្គាល់លើឧត្ដមភាពនៃការរចនា ភាពច្នៃប្រតិដ្ឋ និងសមត្ថភាពវិជ្ជាជីវៈរបស់ស្ថាបត្យករ និងអ្នកជំនាញផ្នែករចនារបស់កម្ពុជា ដែលបានឆ្លុះបញ្ចាំងពីសក្ដានុពល និងសមត្ថភាពរបស់កម្ពុជា ក្នុងការចូលរួមប្រកួតប្រជែង និងការទទួលស្គាល់នៅលើឆាកអន្តរជាតិ។

កម្មវិធីពានរង្វាន់រចនាស្ថាបត្យកម្មអាស៊ីឆ្នាំ ២០២៦ បានប្រមូលផ្ដុំស្ថាបត្យករ អ្នករចនា អ្នកអភិវឌ្ឍន៍ និងអ្នកដឹកនាំច្នៃប្រតិដ្ឋបំផុសគំនិត ក្នុងការប្រារព្ធពិធីដែលមិនអាចបំភ្លេចបាននៃឧត្ដមភាពរចនា។

សមិទ្ធផលនេះថា ជាការរួមចំណែកដ៏មានតម្លៃក្នុងការលើកកម្ពស់កិត្យានុភាពនៃវិជ្ជាជីវៈស្ថាបត្យកម្មកម្ពុជា និងការពង្រឹងកេរ្តិ៍ឈ្មោះរបស់ប្រទេសជាតិ លើឆាកតំបន់ និងសកលលោក។ ជាមួយគ្នានេះ សមិទ្ធផលនេះក៏ជាកម្លាំងជំរុញដល់ស្ថាបត្យករ និងអ្នកជំនាញជំនាន់ថ្មី ឲ្យបន្តប្រកាន់ខ្ជាប់នូវឧត្ដមភាពវិជ្ជាជីវៈ ក្រមសីលធម៌ និងនវានុវត្តន៍ ដើម្បីបង្កើតស្នាដៃដែលមានគុណភាព សុវត្ថិភាព និងអត្តសញ្ញាណជាតិ។

GUBIC + PARTNERS មានសេវាកម្មទាក់ទងប្រឹក្សា និងអភិវឌ្ឍគម្រោង, រចនាស្ថាបត្យកម្ម, រចនាផ្ទៃខាងក្នុង, រចនាប្លង់មេ និងគម្រោងអភិវឌ្ឍន៍, សិក្សាគ្រឿងផ្គុំសំណង់, សិក្សាប្រព័ន្ធមេកានិច អគ្គិសនី និងទឹក (MEP) គ្រប់គ្រង និងសម្របសម្រួលគម្រោង៕

រូបភាព៖ Asia Architecture Design Awards

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត