ក្រុមហ៊ុន ខ្មែរ ប៊ែវើរីជីស (Khmer Beverages) បានសហការជាមួយសហព័ន្ធកីឡាឃីកបុកស៊ីងកម្ពុជា រៀបចំសន្និសីទសារព័ត៌មាន ប្រកាសបើកព្រឹត្តិការណ៍ប្រកួតប្រដាល់ «កំពូលអ្នកចម្បាំងកម្ពុជា» នាព្រឹកថ្ងៃទី១៤ ខែឧសភា ឆ្នាំ២០២៦ នៅផ្សារទំនើប Chip Mong 271 Mega Mall ។ ព្រឹត្តិការណ៍ដ៏ធំនេះ ទទួលបានការឧបត្ថម្ភធំផ្តាច់មុខដោយភេសជ្ជៈកីឡា CAMBODIA SPORT+ ដែលជាផលិតផលថ្មី កំពុងពេញនិយមសម្រាប់អ្នកលេងកីឡា របស់ក្រុមហ៊ុន ខ្មែរ ប៊ែវើរីជីស ។

កម្មវិធីនេះត្រូវបានផ្ដល់កិត្តិយសចូលរួមដោយ លោក អ៊ឹង វិរៈ អគ្គនាយកបន្តវេនក្រុមហ៊ុន ខ្មែរ ប៊ែវើរីជីស, លោក ហេង សុឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជា និង លោក Nasser Nassiri ប្រធានសហព័ន្ធកីឡាប្រដាល់ឃីកបុកស៊ីងអាស៊ី (Asian Kickboxing Confederation)។

ក្នុងឱកាសនោះ លោក អ៊ឹង វិរៈ អគ្គនាយកបន្តវេនក្រុមហ៊ុន ខ្មែរ ប៊ែវើរីជីស បានបង្ហាញនូវក្តីសោមនស្សរីករាយយ៉ាងខ្លាំង ចំពោះការវិវត្តដ៏ឆាប់រហ័សនៃបច្ចេកទេសប្រកួតរបស់កីឡាករ និងការលះបង់របស់គ្រូបង្វឹក។ លោកបានសង្កត់ធ្ងន់ពីចក្ខុវិស័យ និងបេសកកម្មថ្មីរបស់ក្រុមហ៊ុនថា៖ «ការចូលរួមរបស់ ខ្មែរ ប៊ែវើរីជីស នៅថ្ងៃនេះ គឺជាបេសកកម្មរួមគ្នាជាមួយសហព័ន្ធ ក្នុងការលើកកម្ពស់កិត្តិយសជាតិ។ តាមរយៈភេសជ្ជៈកីឡា CAMBODIA SPORT+ យើងកំពុងបោះជំហ៊ានថ្មីមួយទៀតលើវិស័យកីឡាប្រយុទ្ធ តាមរយៈសង្វៀន “កំពូលអ្នកចម្បាំង CAMBODIA SPORT+” ដើម្បីពង្រឹងសមត្ថភាព និងជួយជំរុញដល់កីឡាករ-កីឡាការិនីខ្មែរ ឱ្យកាន់តែមានទីផ្សារ និងភាពល្បីល្បាញលើឆាកអន្តរជាតិ។»

ដូចដែលបងប្អូនបានជ្រាបស្រាប់ហើយថា ខ្មែរ ប៊ែវើរីជីស បានសម្រេចឧបត្ថម្ភបន្ថែមនូវថវិកាចំនួន ៥០០ លានរៀល ទៅកាន់សហព័ន្ធកីឡាប្រដាល់ឃីកបុកស៊ីងកម្ពុជា ដើម្បីស្វែងរកគ្រូបង្វឹកពូកែៗ មកជួយស្រាវជ្រាវក្បួនខ្នាត យុទ្ធសាស្ត្រ និងការហ្វឹកហាត់ឱ្យបានកាន់តែស៊ីជម្រៅ សំដៅលើការបង្កើនគុណភាពកីឡាករ-កីឡាការិនីយើង ឱ្យមានសមត្ថភាពខ្លាំងទ្វេដង ត្រៀមខ្លួនឆ្ពោះទៅកាន់កម្រិតអាជីពលំដាប់ពិភពលោក។

ជាមួយគ្នានោះដែរ លោក ហេង សុឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជា ក៏បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន ខ្មែរ ប៊ែវើរីជីស ដែលតែងតែផ្តល់ការគាំទ្រយ៉ាងសកម្ម និងទាន់ពេលវេលា។

ព្រឹត្តិការណ៍ «កំពូលអ្នកចម្បាំងកម្ពុជា» ឧបត្ថម្ភដោយ CAMBODIA SPORT+ មិនត្រឹមតែជាការប្រកួតដើម្បីស្វែងរកអ្នកឈ្នះប៉ុណ្ណោះទេ ប៉ុន្តែគឺជាវេទិកាកម្រិតស្តង់ដារមួយដែលអនុញ្ញាតឱ្យកីឡាករឃីកបុកស៊ីងកម្ពុជា បានបញ្ចេញសមត្ថភាពស្របតាមច្បាប់អន្តរជាតិ។ ការមានវត្តមានរបស់ប្រធានសហព័ន្ធកីឡាប្រដាល់ឃីកបុកស៊ីងអាស៊ី ក្នុងកម្មវិធីនេះ ក៏ជាសក្ខីភាពបង្ហាញថា កម្ពុជាកំពុងដើរលើផ្លូវដ៏ត្រឹមត្រូវក្នុងការធ្វើសមាហរណកម្មកីឡាប្រយុទ្ធរបស់ខ្លួនទៅកាន់ពិភពលោក។

CAMBODIA SPORT+ បំពេញក្តីស្រម៉ៃ ជួយជម្រុញកីឡាឃីកបុស៊ីងនៅកម្ពជា