Oliver Tree បានទទួលមរណភាពក្នុងវ័យ ៣២ ឆ្នាំ ដោយសារគ្រោះថ្នាក់ធ្លាក់ឧទ្ធម្ភាគចក្រ កាលពីព្រឹកថ្ងៃទី ១៤ ខែមិថុនា នេះ នៅក្នុងទីក្រុង Rio de Janeiro ប្រទេសប្រេស៊ីល។

ផ្អែកតាមការចុះផ្សាយរបស់ NBC News គ្រោះថ្នាក់នេះបានកើតឡើង ដោយសារឧទ្ធម្ភាគចក្រចំនួន ២ គ្រឿង បានបុកគ្នានៅលើអាកាស មុននឹងធ្លាក់ចុះក្រោម បណ្តាលឱ្យមនុស្សចំនួន ៦ នាក់ស្លាប់បាត់បង់ជីវិត រួមទាំង Oliver Tree។

នាយកដ្ឋានពន្លត់អគ្គិភ័យយោធាប្រចាំទីក្រុង Rio de Janeiro បានឱ្យដឹងថា ឧទ្ធម្ភាគចក្រ ១ ក្នុងចំណោមទាំង ២ គ្រឿងនោះ បានធ្លាក់ចំកន្លែងលក់រថយន្ត ដែលមានរថយន្តអគ្គិសនីជាច្រើនគ្រឿងកំពុងចត បណ្ដាលឱ្យមានអគ្គិភ័យកើតឡើង ក៏ប៉ុន្តែត្រូវបានពន្លត់ទៅវិញទាន់ពេលវេលា។

យ៉ាងណាមិញ បច្ចុប្បន្នមន្ត្រីជំនាញកំពុងតែបើកការស៊ើបអង្កេត ដើម្បីស្វែងរកមូលហេតុពិតប្រាកដនៃគ្រោះថ្នាក់មួយនេះ។

គួរឱ្យដឹងផងដែរថា Oliver Tree កំពុងស្ថិតក្នុងចន្លោះការប្រគំតន្ត្រីទេសចរណ៍ សម្រាប់អាល់ប៊ុមខ្នាតពេញទី ៤ របស់ខ្លួនគឺ “Love You Madly, Hate You Badly”។ កាលពីថ្ងៃទី ៤ ខែមិថុនា កន្លងទៅ តារាចម្រៀងរូបនេះទើបតែបានឡើងសម្ដែងនៅក្នុងទីក្រុង Buenos Aires ប្រទេសអាហ្សង់ទីន។

មុនថ្ងៃកើតហេតុមួយថ្ងៃ លោកក៏បានបង្ហោះវីដេអូលើគណនី Instagram ដើម្បីចែករំលែកពីបទពិសោធន៍លើកដំបូងរបស់លោកនៅក្នុងប្រទេសប្រេស៊ីលផងដែរ៕