វ៉ាស៊ីនតោន ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ ប្រកាសនឹងធ្វើជាម្ចាស់ផ្ទះទទួលស្វាគមន៍លោកប្រធានាធិបតីចិន ស៊ី ជីនពីង មកកាន់សេតវិមាននៅចុងឆ្នាំ ២០២៦ នេះ ។

ការប្រកាសនេះធ្វើឡើង ស្របពេលដែលប្រទេសមានសេដ្ឋកិច្ចធំបំផុតទាំងពីររបស់ពិភពលោក កំពុងព្យាយាមស្តារទំនាក់ទំនងឡើងវិញ ក្រោយរងការប៉ះទង្គិចដោយសារសង្គ្រាមពាណិជ្ជកម្មដ៏ក្តៅគគុក ។

ថ្លែងប្រាប់ទូរទស្សន៍ NBC News កាលពីថ្ងៃអាទិត្យ, លោក ត្រាំ និយាយថា លោកប្រធានាធិបតី ស៊ី ជីនពីង នឹងធ្វើដំណើរមកកាន់សេតវិមាននៅចុងឆ្នាំនេះ ក្រោយពេលដែលរូបលោកធ្វើដំណើរទស្សនកិច្ចទៅកាន់ប្រទេសចិនមុន នៅខែមេសាខាងមុខនេះ ។

លោកថា អាមេរិក និងចិន គឺជាប្រទេសដ៏មានឥទ្ធិពលបំផុតពីរនៅលើពិភពលោក ហើយលោកទាំងពីរមានទំនាក់ទំនងល្អណាស់ ។

កាលពីថ្ងៃទី៤ ខែកុម្ភៈ លោក ត្រាំ និងលោក ស៊ី ជីនពីង ធ្លាប់បានសន្ទនាជាមួយគ្នាអំពីសង្គ្រាមរបស់រុស្ស៊ីនៅអ៊ុយក្រែន ស្ថានភាពនៅអ៊ីរ៉ង់ បញ្ហានៅកោះតៃវ៉ាន់ និងសង្គ្រាមពាណិជ្ជកម្មជាដើម ។

ចាប់តាំងពីលោក ត្រាំ វិលត្រឡប់មកសេតវិមានវិញកាលពីមួយឆ្នាំមុន, ប្រធានាធិបតីសហរដ្ឋអាមេរិកវ័យ ៧៩ ឆ្នាំរូបនេះបានដំឡើងពន្ធគយយ៉ាងចាស់ដៃលើប្រទេសចិន រួមទាំងពន្ធលើដែកថែប រថយន្ត និងទំនិញផ្សេងៗទៀត ៕

ប្រភព ៖ CNA ប្រែសម្រួល ៖ ឈឹម ទីណា