ប៊ែរឡាំង ៖ ក្រុមហ៊ុនផលិតឡានខ្នាតយក្សអាល្លឺម៉ង់ BMW កំពុងប្រមូលឡានប្រមាណជាង ៥០០,០០០គ្រឿងចូលក្នុងឃ្លាំងមកជួសជុលឡើងវិញ ដោយសារព្រួយបារម្ភពីហានិភ័យឆាបឆេះដែលអាចកើតមានជាយថាហេតុ ។
បើតាមសារព័ត៌មានពាណិជ្ជកម្មរថយន្តអាល្លឺម៉ង់ kfz-betrieb, ក្រុមហ៊ុន BMW កំពុងប្រមូលឡានសរុបចំនួន ៥៧៥.០០០គ្រឿង នៅទូទាំងពិភពលោកមកជួសជុលឡើងវិញ ក្នុងនោះមានឡានជិត ២៥.០០០គ្រឿងនៅចក្រភពអង់គ្លេស និងអៀរឡង់ ។
អ្នកនាំពាក្យរបស់ក្រុមហ៊ុន BMW បាននិយាយថា ការប្រមូលមកវិញនេះ ប៉ះពាល់ដល់រថយន្តម៉ូដែលផ្សេងៗជាច្រើន ដែលផលិតឡើងនៅចន្លោះខែកក្កដា ឆ្នាំ២០២០ និងខែកក្កដា ឆ្នាំ២០២២ ។
មូលហេតុនៅពីក្រោយការប្រមូលមកវិញនេះ គឺដោយសារតែបញ្ហាដំណើរការខុសប្រក្រតីនៅក្នុងប្រព័ន្ធម៉ូទ័របញ្ឆេះម៉ាស៊ីន ដែលធ្វើឲ្យវាពិបាក ឬមិនអាចដំណើរការរថយន្តបាន ហើយអាចបណ្តាលឲ្យមានភ្លើងឆាបឆេះនៅក្នុងករណីដ៏អាក្រក់បំផុត ។
សូមរម្លឹកថា នៅឆ្នាំ២០២៤ ក្រុមហ៊ុនផលិតឡានខ្នាតយក្សរបស់អាល្លឺម៉ង់មួយនេះ បានកត់ត្រាការខាតបង់ទឹកប្រាក់អស់រាប់រយលានអឺរ៉ូ ខណៈដែល BMW បានប្រមូលឡានសរុបចំនួន ១,៥លានគ្រឿងមកជួសជុលឡើងវិញ ដោយសារបញ្ហាហ្វ្រាំងដែលផ្គត់ផ្គង់ដោយក្រុមហ៊ុន Continental ៕
ប្រភព ៖ AFP និង The Standard ប្រែសម្រួល ៖ ឈឹម ទីណា
STOCKSHOTS: German carmaker BMW
