វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ បានបញ្ចេញវោហាសាស្រ្តគំរាមចំៗកាលពីថ្ងៃសុក្រថា ការផ្លាស់ប្តូរអំណាច ឬក៏រដ្ឋាភិបាលនៅក្នុងប្រទេសអ៊ីរ៉ង់ នឹងក្លាយជារឿងដ៏ល្អបំផុតដែលគួរតែកើតឡើង ។
ការថ្លែងបែបនេះរបស់លោកប្រធានាធិបតី ត្រាំ គឺជាការផ្ញើសារដ៏ច្បាស់លាស់បំផុតមួយរបស់លោក បង្ហាញពីគោលបំណងចង់ផ្តួលរលំរបបដឹកនាំនៅអ៊ីរ៉ង់ ខណៈដែលរូបលោកបានបញ្ជាឱ្យបញ្ជូននាវាផ្ទុកយន្តហោះ USS Gerald R. Ford ដែលជានាវាចម្បាំងធំជាងគេបំផុតរបស់ពិភពលោកទៅកាន់មជ្ឈិមបូព៌ា ដើម្បីបង្កើនសម្ពាធយោធាលើទីក្រុងតេហេរ៉ង់ ។
ការអត្ថាធិប្បាយរបស់លោក ត្រាំ នេះដែរ កើតឡើងនៅពេលដែលមេដឹកនាំអាមេរិករូបនេះ ជំរុញឱ្យប្រទេសអ៊ីរ៉ង់ ដែលជាសត្រូវដ៏សំខាន់របស់ទីក្រុងវ៉ាស៊ីនតោន ចូលខ្លួនមកធ្វើកិច្ចព្រមព្រៀងដ៏ត្រឹមត្រូវមួយ ដើម្បីកំណត់កម្មវិធីនុយក្លេអ៊ែរ បើសិនចង់ជៀសវាងរងការវាយប្រហារកងកម្លាំងយោធាអាមេរិក ។
គួរបញ្ជាក់ថា បច្ចុប្បន្ន ពិភពលោកកំពុងតាមដានយ៉ាងយកចិត្តទុកដាក់ ខណៈដែលអាមេរិក និងអ៊ីរ៉ង់ កំពុងស្ថិតនៅលើមាត់ជ្រោះនៃជម្លោះយោធានៅតំបន់មជ្ឈិមបូព៌ា ដែលអាចផ្ទុះឡើងនៅពេលណាក៏បាន ប្រសិនបើការចរចាការទូតមិនទទួលបានលទ្ធផលជាផ្លែផ្កានោះទេ ៕
ប្រភព ៖ AFP ប្រែសម្រួល ៖ ឈឹម ទីណា
