តេហេរ៉ង់ ៖ ប្រទេសអ៊ីរ៉ង់បានអះអាងជាថ្មីទៅកាន់អាមេរិកថា កម្មវិធីមីស៊ីលរបស់ទីក្រុងតេអេរ៉ង់ នៅតែជាខ្សែបន្ទាត់ក្រហម មិនអាចចរចាបានដាច់ខាត ហើយបានព្រមានថា ទីក្រុងហេតេរ៉ង់នឹងឆ្លើយតបយ៉ាងធ្ងន់ធ្ងរ ចំពោះសកម្មភាពយោធាណាមួយ ។

ការសម្លុតគំរាមរបស់អ៊ីរ៉ង់ ធ្វើឡើងស្របពេលដែលប្រធានាធិបតិអាមេរិក លោក ដូណាល់ ត្រាំ បានបញ្ជាឱ្យបញ្ជូននាវាផ្ទុកយន្តហោះ USS Gerald R. Ford ដែលជានាវាចម្បាំងធំជាងគេបំផុតរបស់ពិភពលោកទៅកាន់មជ្ឈិមបូព៌ា ដើម្បីបង្កើនសម្ពាធយោធាលើទីក្រុងតេហេរ៉ង់ ក្នុងគ្រាដែលកិច្ចខិតខំប្រឹងប្រែងផ្នែកការទូតហាក់ជាប់គាំង ។

លោក Ali Shamkhani ដែលជាទីប្រឹក្សានយោបាយជាន់ខ្ពស់របស់មេដឹកនាំកំពូលអ៊ីរ៉ង់ លោក Ali Khamenei បានអះអាងថា កិច្ចចរចារវាងអ៊ីរ៉ង់ និងអាមេរិកអាចជំរុញ និងការពារផលប្រយោជន៍ទៅវិញទៅមក ប្រសិនបើកិច្ចពិភាក្សាទាំងនោះ មានឫសគល់លើភាពប្រាកដនិយម និងជៀសវាងការទាមទារហួសហេតុ ។

ទោះបីជាយ៉ាងណា លោកបានសង្កត់ធ្ងន់ថា អំណាចមីស៊ីលរបស់អ៊ីរ៉ង់ ស្ថិតក្នុងបន្ទាត់ក្រហម ហើយមិនអាចចរចាជាដាច់ខាត ។ លោកថា យោធានៅតែប្រុងប្រយ័ត្នខ្ពស់ និងព្រមានថា តម្លៃតបស្នងនៃការគណនាខុសណាមួយដោយមហាអំណាចខាងក្រៅ នឹងខ្ពស់ខ្លាំងណាស់ ។

ស្ថានភាពនៅមជ្ឈិមបូព៌ាកំពុងស្ថិតនៅមាត់ជ្រោះដ៏គ្រោះថ្នាក់ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានបញ្ចេញវោហាសាស្រ្តគំរាមចំៗកាលពីថ្ងៃសុក្រថា ការផ្លាស់ប្តូរអំណាច ឬក៏រដ្ឋាភិបាលនៅក្នុងប្រទេសអ៊ីរ៉ង់ នឹងក្លាយជារឿងដ៏ល្អបំផុតដែលគួរតែកើតឡើង ៕

ប្រភព ៖ ស៊ីនហួរ ប្រែសម្រួល ៖ ឈឹម ទីណា