ហាណូយ ៖ ទីបំផុត ក្រុមហ៊ុនអវកាសឯកជន SpaceX របស់លោកមហាសេដ្ឋី Elon Musk អាចចាប់ផ្តើមបើកសេវាកម្មអ៊ីនធឺណិតតាមផ្កាយរណប Starlink នៅវៀតណាមបានហើយ ក្រោយទទួលបានការអនុញ្ញាតពីរដ្ឋាភិបាលទីក្រុងហាណូយ ។
បើតាមសារព័ត៌មាន CNA ចេញផ្សាយថ្ងៃអាទិត្យ, ក្រសួងវិទ្យាសាស្រ្ត និងបច្ចេកវិទ្យាវៀតណាម បានផ្តល់អាជ្ញាប័ណ្ណក្នុងស្រុកដល់ក្រុមហ៊ុន Starlink របស់ SpaceX ទាំងសេវាកម្មអ៊ីនធឺណិតនៅផ្ទះ ឬកន្លែងធ្វើការ និងតាមទូរស័ព្ទ ។
យោងតាមមជ្ឈមណ្ឌលព័ត៌មានបណ្តាញអ៊ីនធឺណិតវៀតណាម, ជិត ៨០ភាគរយនៃក្នុងចំណោមប្រជាជនវៀតណាមប្រហែល ១០០លានដុល្លារ គឺជាអ្នកប្រើប្រាស់អ៊ីនធឺណិត ។ ប៉ុន្តែប្រជាជនរស់នៅតំបន់ជនបទដាច់ស្រយាល និងតំបន់ភ្នំ ពុំទាន់មានអ៊ីនធឺណិតប្រើប្រាស់នៅឡើយទេ។
ជាការឆ្លើយតប ក្រុមហ៊ុន Starlink ដែលមានមូលដ្ឋាននៅសហរដ្ឋអាមេរិក បានប្រកាសថា បញ្ហានេះនឹងត្រូវបានដោះស្រាយ នៅពេលដែលខ្លួនចាប់ផ្តើមបើកសេវាកម្មអ៊ីនធឺណិតនៅវៀតណាមក្នុងពេលឆាប់ៗនេះ បន្ទាប់ពីទទួលបានអាជ្ញាប័ណ្ណផ្លូវការ ។
គួរបញ្ជាក់ថា វៀតណាមបានក្លាយជាប្រទេសទី៥ នៅតំបន់អាស៊ីអាគ្នេយ៍ ដែលប្រើប្រាស់សេវាកម្មអ៊ីនធឺណិតតាមផ្កាយរណប Starlink របស់ក្រុមហ៊ុន SpaceX បន្ទាប់ពីម៉ាឡេស៊ី ឥណ្ឌូណេស៊ី ហ្វីលីពីន និងសិង្ហបុរី ៕
ប្រភព ៖ CNA និង Japan Times ប្រែសម្រួល ៖ ឈឹម ទីណា
