វ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ និយាយថា រូបលោកនឹងបើកដៃ ឬគាំទ្រអ៊ីស្រាអែលបើកការវាយប្រហារប្រឆាំងទីតាំងមីស៊ីលផ្លោងរបស់អ៊ីរ៉ង់ ប្រសិនបើការចរចារការទូតវាងទីក្រុងវ៉ាស៊ីនតោន និងទីក្រុងតេហេរ៉ង់ បរាជ័យ ។
បើតាមសេចក្តីរាយការណ៍របស់ទូរទស្សន៍ CBS News, លោក ដូណាល់ ត្រាំ បានកត់សម្គាល់ដូច្នេះ នៅពេលដែលមេដឹកនាំអាមេរិករូបនេះ ជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នៅរមណីយដ្ឋាន Mar-a-Lago ក្នុងរដ្ឋ Florida កាលពីខែធ្នូ ដោយដកស្រង់ប្រភពចំនួនពីរដែលដឹងពីបញ្ហានេះ ។
បន្ថែមលើពីការគាំទ្ររបស់លោក ត្រាំ មន្ត្រីយោធា និងចារកម្មអាមេរិកក៏បានពិភាក្សាអំពីរបៀបដែលទីក្រុងវ៉ាស៊ីនតោន អាចជួយអ៊ីស្រាអែលវាយលុកប្រឆាំងនឹងហេដ្ឋារចនាសម្ព័ន្ធមីស៊ីលរបស់អ៊ីរ៉ង់ រួមទាំងគាំទ្រការចាក់សាំងយន្តហោះចម្បាំងអ៊ីស្រាអែលតាមផ្លូវអាកាស និងជួយធានាសុវត្ថិភាពដល់ការហោះហើរពីលើដែនអាកាសប្រទេសពាក់ព័ន្ធក្នុងតំបន់ ។ នេះបើយោងតាមរបាយការណ៍ ។
យ៉ាងណាមិញ ហ្ស៊កដានី អារ៉ាប៊ីសាអូឌីត និងអារ៉ាប់រួម សុទ្ធតែបានបញ្ជាក់ជាសាធារណៈថា ពួកគេនឹងមិនអនុញ្ញាតឱ្យអ៊ីស្រាអែល ប្រើប្រាស់ដែនអាកាសរបស់ប្រទេសខ្លួន បើកការវាយប្រហារប្រឆាំងអ៊ីរ៉ង់ឡើយ ហើយក៏មិនអនុញ្ញាតឱ្យអ៊ីរ៉ង់ធ្វើដូច្នេះដែរ ។
គួរបញ្ជាក់ថា កិច្ចចរចានុយក្លេអ៊ែរអាមេរិក-អ៉ីរ៉ង់ជុំទី២អាចនឹងត្រូវធ្វើឡើងនៅទីក្រុងហ្សឺណែវនៅថ្ងៃអង្គារសប្ដាហ៍នេះ។លោកRubioបានបញ្ជាក់ថាបេសកជនអាមេរិកលោកSteveWittkoffនិងកូនប្រសាររបស់លោកត្រាំគឺលោកJaredKushnerនឹងតំណាងឱ្យទីក្រុងវ៉ាស៊ីនតោននៅក្នុងកិច្ចចរចានេះ។
ប្រភព ៖ ស៊ីនហួរ ប្រែសម្រួល ៖ ឈឹម ទីណា
