ញូវ ដែល្លី ៖ ប្រមុខអង្គការសហប្រជាជាតិ បានព្រមាន នៅថ្ងៃព្រហស្បតិ៍នេះថា AI មិនអាចជាប្រយោជន៍ សម្រាប់តែមហាសេដ្ឋី មួយចំនួនតូច បានទេ។

ថ្លែងនៅក្នុងកិច្ចប្រជុំកំពូល ស្តីពីបញ្ញាសិប្បនិម្មិត ឬ AI ជាសកល នៅប្រទេសឥណ្ឌា, លោក Antonio Guterres ក៏បានអំពាវនាវ ដល់មហាសេដ្ឋីបច្ចេកវិទ្យា ទាំងនោះ ឱ្យគាំទ្រមូលនិធិសកលចំនួន ៣ ពាន់លានដុល្លារ ដើម្បីធានាឱ្យមានលទ្ធភាពបើកចំហរ ចំពោះបច្ចេកវិទ្យាជឿនលឿន សម្រាប់ទាំងអស់គ្នា។

លោក បានបញ្ជាក់ថា «AI ត្រូវតែ ជា របស់មនុស្សគ្រប់គ្នា» ។ លោកបានបន្ថែមថា «អនាគតនៃ AI មិនអាចសម្រេចបាន ដោយប្រទេសមួយចំនួនតូច ឬ ទុកអោយតែមហាសេដ្ឋី ពីរ បីនាក់ នោះទេ» ដោយលោកបានព្រមានថា ពិភពលោកនឹងប្រថុយនឹងវិសមភាព កាន់តែស៊ីជម្រៅ លុះត្រាតែមានវិធានការបន្ទាន់។

ជាការកត់សម្គាល់ អង្គការសហប្រជាជាតិ បានបង្កើតស្ថាប័នប្រឹក្សាវិទ្យាសាស្ត្រ AI ដើម្បីជួយប្រទេសនានា ធ្វើការសម្រេចចិត្ត អំពីបច្ចេកវិទ្យាបដិវត្តន៍។

លោក Guterres ក៏បានព្រមាន នាពេលនោះដែរ ថា មនុស្សត្រូវតែ ត្រូវបានការពារ ពីការកេងប្រវ័ញ្ច ហើយថា «គ្មានកុមារណា គួរតែក្លាយជាប្រធានបទ សាកល្បង សម្រាប់ AI ដែលមិនមានការគ្រប់គ្រង នោះឡើយ»៕

ប្រភពពី AFP ប្រែសម្រួល ៖ សារ៉ាត