បរទេស ៖ កោះស្វយ័ត Greenland នៅប្រទេសដាណឺម៉ាក បានបដិសេធការផ្តល់ជូន នាវាមន្ទីរពេទ្យអាមេរិក របស់លោកប្រធានាធិបតី Donald Trump។

ជំហរបែបនេះ បានកើតឡើង បន្ទាប់ពីលោក Trump បានបង្ហោះ នៅលើវេទិកាសង្គម បង្ហាញរូបភាព AI ពណ៌នាអំពីនាវាមន្ទីរពេទ្យ USNS Mercy ដែលត្រូវបញ្ជូនទៅ Greenland កាលពីថ្ងៃអាទិត្យ។ លោកប្រាប់ថា នាវានេះ នឹងព្យាបាលមនុស្សឈឺ ជាច្រើននាក់ ដែលមិនត្រូវបានគេយកចិត្តទុកដាក់ នៅទីនោះ។

ភ្លាមៗ តំបន់សម្បូរទឹកកក និងធនធានកម្រ មួយនេះ បានច្រានចោលសំណើនេះ។ នាយករដ្ឋមន្ត្រី Greenland លោក Jens-Frederik Nielsen តបវិញថា «មិនត្រូវការទេ អរគុណ! យើងមានប្រព័ន្ធសុខភាពសាធារណៈ ដែលការថែទាំ គឺ ឥតគិតថ្លៃ សម្រាប់ពលរដ្ឋ»។

កន្លងមក វោហាសាស្ត្រ របស់លោក Trump ជុំវិញការទាមទារគ្រប់គ្រងតំបន់នេះ បានបង្កើនភាពតានតឹង រវាងសហរដ្ឋអាមេរិក និងដាណឺម៉ាក ខណៈពេលដែលមានការចាប់អារម្មណ៍ជាសកល ទៅលើតំបន់អាក់ទិកមួយនេះ ខណៈដែលលោក បានទទូចថា Greenland សម្បូររ៉ែ មានសារៈសំខាន់ សម្រាប់សន្តិសុខសហរដ្ឋអាមេរិក និង អង្គការណាតូ ប្រឆាំងនឹងប្រទេសរុស្ស៊ី និងប្រទេសចិន៕

ប្រភពពី AFP ប្រែសម្រួល ៖ សារ៉ាត