ញូវ ដែល្លី ៖ នាយករដ្ឋមន្រ្តីឥណ្ឌា លោក Narendra Modi នៅថ្ងៃពុធនេះ បានធ្វើដំណើរ ទៅកាន់ប្រទេសអ៊ីស្រាអែល ដែលជាការចាប់ផ្តើម ដំណើរទស្សនកិច្ច រយៈពេល ២ថ្ងៃ។

បើតាម AFP, គោលដៅសំខាន់ នៃជើងនេះ គឺដើម្បីធ្វើឱ្យទំនាក់ទំនងកាន់តែស៊ីជម្រៅ ក្នុងភាពជាដៃគូពាណិជ្ជកម្ម និង ការពារជាតិ ដ៏សំខាន់។

លោក Modi បាននិយាយ នៅក្នុងសេចក្តីថ្លែងការណ៍មួយថា «ប្រជាជាតិរបស់យើងចែករំលែកភាពជាដៃគូយុទ្ធសាស្ត្រដ៏រឹងមាំ និង ពហុភាគី» ដោយនិយាយទៀតថា លោកនឹងជួប លោក Benjamin Netanyahu នាយករដ្ឋមន្ត្រីអ៊ីស្រាអែល និង ថ្លែងទៅកាន់សភា Knesset របស់អ៊ីស្រាអែល។

លោកបន្តថា «ទំនាក់ទំនង បានពង្រឹងយ៉ាងខ្លាំង ក្នុងរយៈពេលប៉ុន្មានឆ្នាំចុងក្រោយនេះ ក្នុងនោះ ទីក្រុង ញូវដែល្លី បានពង្រីកជាលំដាប់នូវកិច្ចសហប្រតិបត្តិការ ជាមួយអ៊ីស្រាអែល លើវិស័យការពារជាតិ កសិកម្ម បច្ចេកវិទ្យា និង សន្តិសុខតាមអ៊ីនធឺណិត ខណៈពេលដែលមានតុល្យភាពផលប្រយោជន៍ការទូត នៅមជ្ឈិមបូព៌ា»។

មុនពេល លោក Narendra Modi ទៅដល់ក្រុងហ៊្សេរុយសាឡិម, លោក Benjamin Netanyahu បានប្រកាសថា ដំណើរទស្សនកិច្ចនេះ នឹងជួយបង្កើតសម្ព័ន្ធភាពថ្មីមួយ ដើម្បីប្រឆាំងនឹង អ្វីដែលលោកបានពិពណ៌នាថា ជាសត្រូវ “រ៉ាឌីកាល់”៕

ប្រភពពី AFP ប្រែសម្រួល៖ សារ៉ាត