ប៉េកាំង ៖ ប្រទេសចិននឹងបញ្ជាទិញយន្តហោះបន្ថែមទៀតពីក្រុមហ៊ុនអាកាសចរណ៍យក្សរបស់អឺរ៉ុប Airbus ឲ្យកើនឡើងដល់ទៅ ១២០ គ្រឿង ។ នេះបើតាមអះអាងរបស់លោកអធិការបតីអាល្លឺម៉ង់ Friedrich Merz ។

ថ្លែងប្រាប់អ្នកសារព័ត៌មាន បន្ទាប់ពីបញ្ចប់ជំនួបជាមួយលោកប្រធានាធិបតីចិន Xi Jinping នៅរដ្ឋធានីប៉េកាំងកាលពីថ្ងៃពុធ, លោក Friedrich Merz និយាយថា ការបញ្ជាទិញបន្ថែមនេះ នឹងធ្វើឱ្យចំនួនយន្តហោះដែលចិនទិញពីក្រុមហ៊ុន Airbus កើនឡើងដល់ទៅ ១២០ គ្រឿង ។

បើតាម Euronews, លោក Merz មិនបានបញ្ជាក់ពីតម្លៃ ឬប្រភេទយន្តហោះដែលទីក្រុងប៉េកាំងមានគម្រោងបញ្ជាទិញ ឬក៏ពេលណាដែលការទិញនេះអាចកើតឡើងនោះទេ ។

ប៉ុន្តែក្រុមហ៊ុនអាកាសចរណ៍ Air China បានប្រកាសកាលពីឆ្នាំមុនថា ក្រុមហ៊ុនអាកាសចរណ៍ចិន និងក្រុមហ៊ុនបុត្រសម្ព័ន្ធរបស់ខ្លួនបានចុះហត្ថលេខាលើកិច្ចព្រមព្រៀងជាមួយក្រុមហ៊ុន Airbus ដើម្បីបញ្ជាទិញយន្តហោះដឹកអ្នកដំណើរធុន A320neo ចំនួន ៦០ គ្រឿង ក្នុងតម្លៃប្រហែល ៩,៥៣0 លានដុល្លារ ។

បើតាមប្រភពពី Global Times, ក្រុមហ៊ុនអាកាសចរណ៍ Air China បានប្រកាសនៅក្នុងឯកសារដែលបានដាក់ជូនទៅផ្សារហ៊ុនសៀងហៃថា យន្តហោះទាំងនេះរំពឹងនឹងដឹកជញ្ជូនមកដល់នៅចន្លោះឆ្នាំ ២០២៨ និង ២០៣២ ៕

ប្រភព ៖ Euronews និង Anadolu Agency ប្រែសម្រួល ៖ ឈឹម ទីណា