ហាវ៉ាណា៖ ប្រទេសគុយបាអាចនឹងក្លាយជាគោលដៅបន្ទាប់នៃការវាយប្រហាររបស់សហរដ្ឋអាមេរិក បន្ទាប់ពីប្រតិបត្តិការយោធាប្រឆាំងនឹងប្រទេសវ៉េណេស៊ុយអេឡា និងអ៊ីរ៉ង់ ។ នេះបើតាមការចុះផ្សាយដោយកាសែត The Atlantic នៅថ្ងៃចន្ទនេះ ។

កាសែតអាមេរិកមួយនេះ បានរាយការណ៍ដូច្នេះ ដោយយោងតាមប្រភពនានា ដែលបានប្រាប់ថា ថ្នាក់ដឹកនាំអាមេរិកកំពុងពិចារណាធ្វើ ផ្អែកលើលទ្ធផល នៃសកម្មភាពស្រដៀងគ្នា ប្រឆាំងនឹង វេណេស៊ុយអេឡា និង អ៊ីរ៉ង់។

កាសែតអាមេរិកមួយនេះសរសេរថា «លោកប្រធានាធិបតីសហរដ្ឋអាមេរិក Donald Trump កំពុងពិចារណាធ្វើសកម្មភាពយោធាទៅលើប្រទេសគុយបា បន្ទាប់ពីជោគជ័យលើ វេណេស៊ុយអេឡា និង អ៊ីរ៉ង់ ។

កាសែតដដែលបញ្ជាក់ថា លោក Trump អាចធ្វើអ្វីបានគ្រប់យ៉ាង ដោយសារតែលោក Trump មើលឃើញខ្លួនឯងថា ជាមេដឹកនាំអាមេរិក សម័យទំនើបដំបូងគេ ដែលអាចបំពេញនូវអ្វី ដែលអ្នកផ្សេងទៀតគ្រាន់តែគិតចង់ធ្វើ តែមិនហ៊ានធ្វើ ។

បើតាមទីភ្នាក់ងារព័ត៌មាន Tass, រដ្ឋបាលរបស់ លោក Trump ជឿថា គម្រោងការផ្តួលរំលំរដ្ឋាភិបាលគុយបា ពិតជាស័ក្តសមនឹងគោលដៅរបស់ខ្លួន ព្រោះថា គម្រោងនេះនឹងពង្រឹងការគ្រប់គ្រងរបស់អាមេរិកនៅក្នុងអឌ្ឍគោលខាងលិច ។

យ៉ាងណា ទីក្រុង វ៉ាស៊ីនតោន កំពុងជ្រើសរើសយកវិធីសាស្ត្រដាក់សម្ពាធសេដ្ឋកិច្ចកាន់តែខ្លាំងលើប្រទេសអាមេរិកឡាទីន មួយនេះ ។

ម្យ៉ាងទៀត សេតវិមានធ្លាប់ព្រមានថា ប្រតិបត្តិការដ៏មានសក្ដានុពលមួយ ប្រឆាំងនឹងគុយបា គឺ ពោរពេញដោយហានិភ័យ ដោយសារតែ អាចបណ្តាលឱ្យមានការហូរចូលជនភៀសខ្លួន ទៅកាន់សហរដ្ឋអាមេរិក ៕

ប្រភពពី Tass ប្រែសម្រួល ៖ សារ៉ាត