ប៉េកាំង ៖ រដ្ឋមន្ត្រីការបរទេសចិន លោក Wang Yi បានប្រាប់សមភាគីអ៊ីស្រាអែល លោក Gideon Saar នៅថ្ងៃទី៣ ខែមីនា ថា ចិនប្រឆាំងដាច់ខាត ចំពោះការវាយប្រហារដោយយោធារបស់អ៊ីស្រាអែល និងអាមេរិកប្រឆាំងអ៊ីរ៉ង់ ហើយទាមទារឱ្យមានការបញ្ឈប់អរិភាពជាបន្ទាន់ ។

បើតាមក្រសួងការបរទេសចិន, អំឡុងការសន្ទនាតាមទូរស័ព្ទ លោក Wang បានប្រាប់លោក Saar ថា ការប្រើប្រាស់កម្លាំងយោធា មិនអាចដោះស្រាយបញ្ហាទេ ។

ផ្ទុយទៅវិញ វាមានតែបង្កើតបញ្ហាថ្មីៗ និងបន្សល់ទុកផលវិបាកធ្ងន់ធ្ងររយៈពេលវែងប៉ុណ្ណោះ ។ លោកថា តម្លៃពិតនៃអំណាចយោធា មិនមែនស្ថិតនៅលើសមរភូមិនោះទេ ប៉ុន្តែស្ថិតនៅក្នុងការទប់ស្កាត់សង្គ្រាម ។

លោក Wang បានប្រាប់លោក Saar ទៀតថា ចិនជឿជាក់លើការដោះស្រាយបញ្ហាអន្តរជាតិ និងតំបន់ តាមរយៈការសន្ទនា និងការចរចា ហើយនឹងបន្តដើរតួនាទីស្ថាបនា ក្នុងការបន្ធូរបន្ថយស្ថានការណ៍តានតឹង ។

ទោះបីជាយ៉ាងណា លោក Wang មិនបាននិយាយទូរស័ព្ទជាមួយរដ្ឋមន្ត្រីការបរទេសអាមេរិក លោក Marco Rubio ទេ ចាប់តាំងពីអាមេរិក និងអ៊ីស្រាអែលរួមដៃគ្នាវាយប្រហារអ៊ីរ៉ង់ នៅថ្ងៃទី២៨ ខែកុម្ភៈ ពោលគឺក្រោយពេលមេដឹកនាំកំពូលអ៊ីរ៉ង់ លោក Ayatollah Ali Khamenei ស្ថិតក្នុងចំណោមមន្ត្រីជាន់ខ្ពស់អ៊ីរ៉ង់មួយចំនួន ដែលត្រូវបានសម្លាប់ ។

សង្គ្រាមនេះ បានឆាបឆេះទូទាំងទីក្រុងតេហេរ៉ង់ របស់អ៊ីរ៉ង់ និងបេរូត របស់លីបង់ កាលពីថ្ងៃទី៣ ខែមីនា ខណៈដែលទីផ្សារហិរញ្ញវត្ថុជុំវិញពិភពលោកបានដាំក្បាលចុះ ហើយមានការរំពឹងទុកថា វានឹងបង្កការរំខានយូរអង្វែងដល់ការផ្គត់ផ្គង់ថាមពលសកល ៕

ប្រភព ៖ The Straits Times ប្រែសម្រួល ៖ ឈឹម ទីណា