ប៉ារីស ៖ ប្រធានាធិបតីបារាំង លោក អេម៉ានុយអែល ម៉ាក្រុង បានព្រមានធ្ងន់ៗថា ប្រសិនបើអ៊ីរ៉ង់ហ៊ានវាយប្រហារលើប្រទេសស៊ីប នោះមានន័យថា ដូចវាយប្រហារលើប្រទេសអឺរ៉ុបទាំងមូលអីចឹងដែរ ដូច្នេះសង្គ្រាមនឹងកាន់តែរីកធំឡើងហួសពីការស្មាន ។

ការព្រមានបែបនេះរបស់លោក ម៉ាក្រុង ធ្វើឡើងនៅពេលដែលមេដឹកនាំបារាំងរូបនេះ ធ្វើដំណើរទៅដល់ទឹកដីប្រទេសស៊ីប កាលពីថ្ងៃចន្ទ ដោយលោកបានបញ្ជាក់ច្បាស់ៗថា បារាំង និងសម្ព័ន្ធមិត្ត កំពុងរៀបចំបេសកកម្ម “ការពារ” ដើម្បីបើកច្រកសមុទ្រ Hormuz ឡើងវិញ ខណៈសង្គ្រាមមជ្ឈិមបូព៌ាបានចូលដល់សប្តាហ៍ទីពីរ និងកំពុងបង្កជាវិបត្តិថាមពលសកល ។

ពាក់ព័ន្ធនឹងបេសកកម្ម “ការពារ” លោកប្រធានាធិបតី ម៉ាក្រុង បានពន្យល់ថា បេសកកម្មនេះ នឹងមានគោលបំណងអមដំណើរនាវាដឹកទូរកុងតឺន័រ និងនាវាដឹកប្រេង ដើម្បីបើកច្រកសមុទ្រ Hormuz ឡើងវិញបន្តិចម្តងៗ បន្ទាប់ពីបញ្ចប់ដំណាក់កាលក្តៅបំផុតនៃសង្គ្រាមមជ្ឈិមបូព៌ា ។

លោក ម៉ាក្រុង ដែលមានវ័យ៤៩ឆ្នាំរូបនេះ បានសង្កត់ធ្ងន់ថា បេសកកម្មនេះ ដែលចូលរួមដោយរដ្ឋអឺរ៉ុប និងមិនមែនរដ្ឋអឺរ៉ុប ហើយវាផ្តោតសំខាន់តែទៅលើការការពារ និងការគាំទ្រប៉ុណ្ណោះ ។ លោកថា នេះគឺជារឿងចាំបាច់ ដែលមិនត្រឹមតែសម្រាប់ពាណិជ្ជកម្មអន្តរជាតិ ប៉ុន្តែក៏សម្រាប់លំហូរឧស្ម័ន និងប្រេងផងដែរ ៕

គួរបញ្ជាក់ថា ការធ្វើចរាចរណ៍ផ្លូវសមុទ្រនៅច្រកសមុទ្រ Hormuz ដែលជាផ្លូវទឹកដ៏សំខាន់មួយនៅឈូងសមុទ្រ ជាទីដែលប្រេងឆៅ១ភាគ៥នៃពិភពលោកឆ្លងកាត់ ស្ទើរតែឈប់ដំណើរការចាប់តាំងពីសង្គ្រាមរវាងអាមេរិក អ៊ីស្រាអែល និងអ៊ីរ៉ង់ បានផ្ទុះឡើងនៅថ្ងៃទី២៨ ខែកុម្ភៈ ឆ្នាំ២០២៦ ៕

ប្រភព ៖ AFP ប្រែសម្រួល ៖ ឈឹម ទីណា