ហ្ស៊េរុយសាឡិម ៖ នាយករដ្ឋមន្ត្រីនៃប្រទេសអ៊ីស្រាអែល លោក Netanyahu បានអំពាវនាវឲ្យមេដឹកនាំពិភពលោក ចូលរួមក្នុងសង្គ្រាមប្រឆាំងនឹងអ៊ីរ៉ង់។

ក្នុងពេលចុះទៅមើលទីតាំង ដែលរងការវាយប្រហាររបស់អ៊ីរ៉ង់ ​កាលពីថ្ងៃអាទិត្យ, នាយករដ្ឋមន្ត្រីអ៊ីស្រាអែល លោក Benjamin Netanyahu មានប្រសាសន៍ថា «ដល់ពេលហើយ ដើម្បីមើលមេដឹកនាំនៃប្រទេសផ្សេងទៀតចូលរួម»។

លោក Netanyahu បានបន្តដោយ​ប្តេជ្ញា ​តាមកំចាត់​ក្រុម IRGC ​ជា​ក្រុមដែល លោក ហៅថា ជា​ឧក្រិដ្ឋជន​។ ​លោក រៀបរាប់ថា «យើងនឹងតាម​រកអ្នកដឹកនាំ​ ទ្រព្យសម្បត្តិសេដ្ឋកិច្ច របស់ពួកគេ ​យើងនឹងតាមដាន​ ដោយផ្ទាល់»។

ទីក្រុង Dimona បានរងការវាយប្រហារ ដោយកាំជ្រួចរបស់អ៊ីរ៉ង់ កាលពីថ្ងៃសៅរ៍ ដែលត្រូវបានគេជឿថា ជាកន្លែងផ្ទុកអាវុធនុយក្លេអ៊ែរ ដែលមិនបានប្រកាស របស់អ៊ីស្រាអែល។

ដោយស្ថិតនៅវាលខ្សាច់ Negev , តំបន់មួយនេះ បានទទួលរងការខូចខាតយ៉ាងខ្លាំង ពីការវាយប្រហារ។ ពេលទៅដល់ទីនោះ លោក Netanyahu ក៏បានជំរុញឱ្យអ្នកស្រុក គោរពតាមការណែនាំពីទីបញ្ជាការជួរមុខ Home Front របស់យោធា ហើយត្រូវជ្រកកោនជាបន្ទាន់ រាល់ពេលដែលស៊ីរ៉ែន ព្រមានពីមីស៊ីលចូលមក។

លោក Benjamin Netanyahu បញ្ជាក់ថា «ប្រទេសទាំងមូលគឺជាជួរមុខ មុខផ្ទះទាំងមូល គឺជាជួរមុខ»៕

ប្រភពពី AFP ប្រែសម្រួល ៖ សារ៉ាត