សម្តេចតេជោ ហ៊ុន សែន អបអរសាទរខួបលើកទី២៧ ថ្ងៃបង្កើត «ព្រឹទ្ធសភា» ២៥ មីនា ១៩៩៩-២៥ មីនា ២០២៦

ភ្នំពេញ៖ សម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជានៅព្រឹកថ្ងៃទី២៥ ខែមីនា ឆ្នាំ២០២៦ បានបង្ហោះសារអបអរសាទរ ខួបលើកទី២៧ ថ្ងៃបង្កើត «ព្រឹទ្ធសភា» ២៥ មីនា ១៩៩៩-២៥ មីនា ២០២៦ ។

យោងតាមគេហទំព័រព្រឹទ្ធសភានៃព្រះរាជាណាចក្រកម្ពុជា បានបង្ហាញពីសាវតារព្រឹទ្ធសភា នៃព្រះរាជាណាចក្រកម្ពុជា ឱ្យដឹងថា ក្រោយការបោះឆ្នោតជ្រើសតាំងតំណាងរាស្រ្តនីតិកាលទី២ តាមរយៈកិច្ចប្រជុំរវាងថ្នាក់ដឹកនាំជាន់ខ្ពស់របស់គណបក្សនយោបាយធំៗពីរ ដែលទទួលបានអាសនៈ នៅរដ្ឋសភា គឺគណបក្សប្រជាជនកម្ពុជា និងគណបក្សហ៊្វុនស៊ីនប៉ិច នៅថ្ងៃទី១២-១៣ ខែវិច្ឆិកា ឆ្នាំ១៩៩៨ ក្រោមព្រះរាជាធិបតីភាពដ៏ខ្ពង់ខ្ពស់របស់សម្តេចព្រះបរមរតនកោដ្ឋ នរោត្តម សីហនុ អតីតព្រះមហាក្សត្រនៃកម្ពុជា នៅព្រះបរមរាជវាំង ក្នុងស្មារតីលើកកម្ពស់ការបង្រួបបង្រួមជាតិ ផ្សះផ្សាជាតិ ពង្រឹងស្ថិរភាពនយោបាយ និងបន្តប្រវត្តិសាស្រ្តព្រឹទ្ធសភា នៅព្រះរាជាណាចក្រកម្ពុជា ដោយបានឯកភាពធ្វើវិសោធនកម្មរដ្ឋធម្មនុញ្ញ ឆ្នាំ១៩៩៣ដើម្បីបង្កើតឱ្យមានព្រឹទ្ធសភាឡើងវិញ ។

ការបង្កើតព្រឹទ្ធសភា គឺជាព្រឹត្តិការណ៍នយោបាយ ដ៏សំខាន់ក្នុងប្រវត្តិសាស្ត្រ ដោយបានបង្ហាញនូវពន្លឺថ្មីមួយ សម្រាប់ព្រះរាជាណាចក្រកម្ពុជា តាមរយៈការពង្រឹងពង្រីក ស្មារតីបង្រួបបង្រួមជាតិ ផ្សះផ្សាជាតិ ស្ថិរភាពនយោបាយ និងការប្តេជ្ញាចិត្តក្នុងការកសាងលទ្ធិប្រជាធិបតេយ្យ សេរីពហុបក្ស និងនីតិរដ្ឋ ។ អនុលោមតាមច្បាប់ធម្មនុញ្ញ ស្តីពីវិសោធនកម្មរដ្ឋ ធម្មនុញ្ញនៃព្រះរាជាណាចក្រកម្ពុជា ដែលបានចូលជាធរមាន នាថ្ងៃទី៨ ខែមីនា ឆ្នាំ១៩៩៩ ព្រឹទ្ធសភាត្រូវបានបង្កើតឡើង និងបានបើកសម័យប្រជុំលើកទី១ នីតិកាលទី១ នៅថ្ងៃទី២៥ ខែមីនា ឆ្នាំ១៩៩៩ ។

ព្រឹទ្ធសភានីតិកាលទី១ កើតឡើងពីឆ្នាំ១៩៩៩-២០០៦ ។ ព្រឹទ្ធសភានីតិកាលទី២ កើតឡើងពី២០០៦-២០១២។ ព្រឹទ្ធសភានីតិកាលទី៣ កើតឡើងពី២០១២-២០១៨។ ព្រឹទ្ធសភានីតិកាលទី៤ កើតឡើងពី២០១៨-២០២៤ ។

ព្រឹទ្ធសភានីតិកាលទី៥ ពី ២០២៤-២០២៨ បានបើកសម័យប្រជុំដំបូងតាមការកោះប្រជុំ របស់ព្រះមហាក្សត្រ នាថ្ងៃទី៣ខែ មេសា ឆ្នាំ២០២៤ មានសមាជិកចំនួន ៦២ រូប ស្ត្រីចំនួន ១១ រូប ក្នុងនោះ សមាជិកព្រឹទ្ធសភាចំនួន ៥៨រូប ជ្រើសតាំងដោយការបោះឆ្នោតអសកល, សមាជិកព្រឹទ្ធសភាចំនួន ២រូប តែងតាំងដោយព្រះមហាក្សត្រ និងសមាជិកព្រឹទ្ធសភាចំនួន ២ រូប ជ្រើសតាំងដោយរដ្ឋសភា តាមមតិភាគច្រើនដោយប្រៀប ៕

ដោយ៖ វណ្ណលុក

ស៊ូ វណ្ណលុក

ក្រៅពីជំនាញនិពន្ធព័ត៌មានរបស់សម្ដេចតេជោ នាយករដ្ឋមន្ត្រីប្រចាំស្ថានីយវិទ្យុ និងទូរទស្សន៍អប្សរា លោកក៏នៅមានជំនាញផ្នែក និងអាន និងកាត់តព័ត៌មានបានយ៉ាងល្អ ដែលនឹងផ្ដល់ជូនទស្សនិកជននូវព័ត៌មានដ៏សម្បូរបែបប្រកបដោយទំនុកចិត្ត និងវិជ្ជាជីវៈ។