កៀវ ៖ លោក Zelensky អះអាងថា អ៊ុយក្រែន កំពុងពិភាក្សាជាមួយបណ្តាប្រទេស នៅតំបន់មជ្ឈិមបូព៌ា និង បណ្តារដ្ឋ ឈូងសមុទ្រ ស្តីពីការការពារជាតិ។

អ៊ុយក្រែន កំពុងពិភាក្សា ជាមួយបណ្តាប្រទេស នៅតំបន់មជ្ឈិមបូព៌ា និងឈូងសមុទ្រ ដែលមានចំណាប់អារម្មណ៍ពិសេស នៅក្នុងបទពិសោធន៍ របស់អ៊ុយក្រែន ក្នុងការទប់ស្កាត់ យន្តហោះគ្មានមនុស្សបើក នេះបើយោងតាម លោក ប្រធានាធិបតី Volodymyr Zelensky កាលពីថ្ងៃពុធ។

លោក Zelensky បាននិយាយ ចេញពីទីក្រុង Kyiv តាមរយៈសុន្ទរកថា ប្រចាំថ្ងៃ ឲ្យដឹងថា «អ៊ុយក្រែន កំពុងផ្តល់ជូន នូវភាពជាដៃគូ ដែលមានអត្ថប្រយោជន៍ ទៅវិញទៅមក…យើងអាចពង្រឹងអ្នក ហើយអ្នកអាចជួយពង្រឹងពួកយើងវិញ»។

លោក Zelensky កំពុងស្វែងរកកិច្ចព្រមព្រៀង រយៈពេលវែង ជាមួយបណ្តាប្រទេសផ្សេងៗ ដើម្បីផ្តល់ហិរញ្ញប្បទាន ដល់ផលិតកម្ម នៅក្នុងប្រទេសអ៊ុយក្រែន។

ជុំវិញសង្គ្រាមអ៊ីរ៉ង់ អ្នកជំនាញខាងយោធាអ៊ុយក្រែន ប្រហែល ២០០នាក់ ត្រូវបានបញ្ជូន ទៅកាន់ឈូងសមុទ្ររួចហើយ ដើម្បីទៅជួយ បណ្តាប្រទេសឈូងសមុទ្រ លើបច្ចេកទេសទប់ស្កាត់មីស៊ីល និង ដ្រូន របស់អ៊ីរ៉ង់ ៕

ប្រភពពី AFP ប្រែសម្រួល ៖ សារ៉ាត