តេហេរ៉ង់ ៖ កងទ័ពអ៊ីរ៉ង់ បានចេញមុខអះអាងពីការបាញ់មីស៊ីលនាំផ្លូវវាយប្រហារលើនាវាផ្ទុកយន្តហោះចម្បាំង USS Abraham Lincoln របស់សហរដ្ឋអាមេរិក កាលពីថ្ងៃ ពុធ ។

បើតាមសារព័ត៌មាន IRNA មីស៊ីលនាំផ្លូវដែលមានសមត្ថភាពវាយប្រហារគោលដៅឆ្នេរសមុទ្រ ត្រូវបានបាញ់ឆ្ពោះទៅនាវាផ្ទុកយន្តហោះចម្បាំងអាមេរិកមួយនេះ ដោយបង្ខំឲ្យវាផ្លាស់ប្តូរទីតាំងរបស់ខ្លួនជាប្រញាប់ ។ ភ្លាមៗ មិនមានការបញ្ជាក់អះអាងពីសហរដ្ឋអាមេរិកនោះទេ ពាក់ព័ន្ធនឹងសេចក្ដីរាយការណ៍នេះ ។

យ៉ាងណា មេបញ្ជាការកងទ័ពជើងទឹកអ៊ីរ៉ង់ លោកឧត្តមនាវីទោ Shahram Irani និយាយថា ការបម្លាស់ទីនៃនាវាផ្ទុកយន្តហោះរបស់សត្រូវ គឺ Abraham Lincoln កំពុងស្ថិតក្រោមការតាមដានឥតដាច់ ហើយនឹងត្រូវបានកំណត់គោលដៅ នៅពេលដែលវាចូលទៅក្នុងរង្វង់ចម្ងាយនៃប្រព័ន្ធមីស៊ីលរបស់អ៊ីរ៉ង់ ។

គួរបញ្ជាក់ថា សហរដ្ឋអាមេរិក និងអ៊ីស្រាអែល នៅតែបន្តការវាយប្រហារតាមអាកាសលើអ៊ីរ៉ង់ ចាប់តាំងពីថ្ងៃទី២៨ ខែកុម្ភៈ ដោយបានសម្លាប់មនុស្សយ៉ាងតិចជាង ១.៣៤០ នាក់ រួមទាំងមេដឹកនាំកំពូលអ៊ីរ៉ង់ លោក Ali Khamenei ។

អ៊ីរ៉ង់បានសងសឹកវិញ តាមរយៈការវាយប្រហារដោយយន្តហោះដ្រូនអត្តឃាត និងមីស៊ីលដែលកំណត់គោលដៅលើមូលដ្ឋានយោធាអ៊ីស្រាអែល និងសហរដ្ឋអាមេរិក ដែលឈរជើងនៅប្រទេសហ្ស៊កដានី អ៊ីរ៉ាក់ និងបណ្តាប្រទេសឈូងសមុទ្រ បណ្តាលឲ្យមានអ្នកស្លាប់ និងរបួស ព្រមទាំងខូចខាតដល់ហេដ្ឋារចនាសម្ព័ន្ធ និងរំខានដល់ទីផ្សារថាមពលសកល និងវិស័យអាកាសចរណ៍ពិភពលោក ៕

ប្រភព ៖ Anadolu Agency ប្រែសម្រួល ៖ ឈឹម ទីណា