អ៊ីស្លាម៉ាបាដ ៖ ប៉ាគីស្ថាន បានអះអាងថា ទាំងអាមេរិក និងអ៊ីរ៉ង់ សុទ្ធតែទុកចិត្តមកលើខ្លួន ក្នុងការសម្របសម្រួលចរចា បញ្ចប់សង្រ្គាម នៅមជ្ឈិមបូព៌ា។

លោក Ishaq Dar ឧបនាយករដ្ឋមន្រ្ដី និង ជារដ្ឋមន្ត្រីការបរទេស ប៉ាគីស្ថាន មានប្រសាសន៍ កាលពីថ្ងៃអាទិត្យថា អ៊ីរ៉ង់ និងអាមេរិក បានសម្តែង “ទំនុកចិត្ត” នៅក្នុងប្រទេសប៉ាគីស្ថាន សម្រាប់ការសម្របសម្រួល កិច្ចចរចា រវាងប្រទេសទាំងពីរ ជាផ្នែកនៃកិច្ចខិតខំប្រឹងប្រែងរបស់ខ្លួន ដើម្បីបញ្ចប់សង្រ្គាម ដែលកំពុងបន្ត នៅមជ្ឈិមបូព៌ា។

សេចក្តីថ្លែងការណ៍ របស់លោក Dar បានធ្វើឡើង បន្ទាប់ពីលោកមានកិច្ចប្រជុំជាមួយសមភាគី ដែលមកពី ប្រទេស អារ៉ាប៊ី សាអូឌីត, អេហ្ស៊ីប និង តួកគី នៅក្នុងទីក្រុងអ៊ីស្លាម៉ាបាដ។

តាមរយៈសេចក្តីថ្លែងការណ៍, លោក Dar បានរៀបរាប់ទៀតថា រដ្ឋមន្ត្រីការបរទេសទាំងនោះ បានសម្តែងនូវការគាំទ្រ យ៉ាងពេញទំហឹង សម្រាប់កិច្ចពិភាក្សា ដ៏មានសក្តានុពល រវាងសហរដ្ឋអាមេរិក និង អ៊ីរ៉ង់ នៅក្នុងទីក្រុង អ៊ីស្លាម៉ាបាដ (Islamabad) ។

លោកបានបន្ថែមថា «ក្រុមរដ្ឋមន្ត្រីការបរទេស បានតស៊ូមតិ ការសន្ទនា និង ការទូត ជាផ្លូវដែលអាចសម្រេចបានតែមួយគត់ ក្នុងការទប់ស្កាត់ជម្លោះ និងដើម្បីលើកកម្ពស់សន្តិភាព និងភាពសុខដុមរមនា នៅក្នុងតំបន់» ៕

ប្រភពពី AFP ប្រែសម្រួល ៖ សារ៉ាត