ឌូបៃ ៖ សង្គ្រាមរបស់សហរដ្ឋអាមេរិក និងអ៊ីស្រាអែលប្រឆាំងអ៊ីរ៉ង់ ត្រូវបានរំពឹងថា នឹងបំផ្លាញកំណើនសេដ្ឋកិច្ចប្រទេសអារ៉ាប់ជិត ២០០ ពាន់លានដុល្លារនៅទូទាំងតំបន់មជ្ឈិមបូព៌ា នេះបើតាមការសិក្សាថ្មីមួយរបស់អង្គការសហប្រជាជាតិ ។

យោងតាមការវិភាគរបស់កម្មវិធីអភិវឌ្ឍន៍អង្គការសហប្រជាជាតិ (UNDP) អំពីផលវិបាកសេដ្ឋកិច្ច និងសង្គម សម្រាប់បណ្ដារដ្ឋអារ៉ាប់ ដែលចេញផ្សាយនៅថ្ងៃ អង្គារ បានឲ្យដឹងថា ប្រទេសអារ៉ាប់អាចនឹងខាតបង់ចន្លោះពី ១២០ ពាន់លានដុល្លារ ទៅ ១៩៤ ពាន់លានដុល្លារ ក្នុងផលិតផលក្នុងស្រុកសរុប (GDP) ដោយសារតែការរំខានពីសង្គ្រាមអ៊ីរ៉ង់ ។

ទីភ្នាក់ងារនេះបានលើកឡើងថា ខ្លួនបានសិក្សាពីសេណារីយ៉ូផ្សេងៗគ្នាមួយចំនួន ដើម្បីកំណត់ពីរបៀបនៃជម្លោះ ដែលបានចាប់ផ្តើមកាលថ្ងៃទី២៨ ខែកុម្ភៈ អាចប៉ះពាល់ដល់ប្រទេសនានានៅក្នុងតំបន់ ។

អ្នកផ្តួចផ្តើមរបាយការណ៍នេះ ក៏បានព្រមានដែរថា ការខូចខាតអាចធ្ងន់ធ្ងរ បើទោះបីជាសង្គ្រាមបញ្ចប់ក្នុងពេលឆាប់ៗនេះក៏ដោយ ។

បើតាម Bloomberg, ការខាតបង់សរុប អាចបណ្តាលឲ្យអត្រាគ្មានការងារធ្វើក្នុងតំបន់ កើនឡើងរហូតដល់ ៤ ភាគរយ ដែលធ្វើឲ្យបាត់បង់ការងារប្រហែល ៣,៦ លានកន្លែង និងរុញឲ្យមនុស្សរហូតដល់ ៤ លាននាក់ធ្លាក់ចូលទៅក្នុងភាពក្រីក្រ ៕

ប្រភព ៖ Bloomberg ប្រែសម្រួល ៖ ឈឹម ទីណា