តេហេរ៉ង់ ៖ អ៊ីរ៉ង់ និយាយថា មិនមានការគិតថ្លៃ ការដឹកជញ្ជូនទំនិញរបស់អ៊ីរ៉ាក់ ដែលបើកឆ្លងកាត់ច្រកសមុទ្រ Hormuz។

បញ្ជាការយោធាអ៊ីរ៉ង់ បាននិយាយ កាលពីថ្ងៃសៅរ៍ថា ប្រទេសអ៊ីរ៉ង់ នឹងអនុញ្ញាតឱ្យការដឹកជញ្ជូនទំនិញ របស់អ៊ីរ៉ាក់ ឆ្លងកាត់ច្រកសមុទ្រ Hormuz ទោះបីជាមានការបិទផ្លូវដ៏ធំទូលាយនៃផ្លូវសមុទ្រដ៏សំខាន់ នៅមាត់ឈូងសមុទ្រក៏ដោយ ។

អ្នកនាំពាក្យយោធា លោក Ebrahim Zolfaghari បានប្រាប់ទូរទស្សន៍រដ្ឋថា «យើងប្រកាសថា ប្រទេសជាបងប្អូនរបស់យើង គឺ អ៊ីរ៉ាក់ ត្រូវបានលើកលែងពីការរឹតបន្តឹងណាមួយ ដែលយើងបានដាក់ នៅលើច្រកសមុទ្រ Hormuz ហើយការរឹតបន្តឹងទាំងនេះ អនុវត្តចំពោះតែប្រទេសសត្រូវប៉ុណ្ណោះ»។

បើតាម The New York Times, អ៊ីរ៉ង់ កំពុងរៀបចំពិធីសារ ក្រសោបយកច្រក Hormuz មកធ្វើជាកម្មសិទ្ធិរបស់ខ្លួន ដោយសហការ ជាមួយនឹងប្រទេសអូម៉ង់ បើទោះបីជា សង្គ្រាមត្រូវបញ្ចប់ក៏ដោយ។ ការទាមទារកាន់កាប់ របស់អ៊ីរ៉ង់យ៉ាងដូច្នេះ ធ្វើឡើង ចំពេលដែល សាធារណរដ្ឋឥស្លាម មួយនេះ កំពុងរៀបចំផែនការ គិតថ្លៃសេវា ចំពោះកប៉ាល់ដែលឆ្លងកាត់ ផ្លូវទឹក ដែលដឹកញ្ជូន មួយភាគប្រាំ នៃ ប្រេង និង ឧស្ម័នធម្មជាតិ របស់ពិភពលោក មួយនេះ ។

ចាប់តាំងពីការចាប់ផ្តើមយុទ្ធនាការយោធារបស់អាមេរិក និង អ៊ីស្រាអែល មក, អ៊ីរ៉ង់បានបិទចរាចរណ៍ភាគច្រើន ដែលឆ្លងកាត់ច្រកសមុទ្រ ស្ថិតនៅឆ្នេរ ភាគខាងត្បូងរបស់ខ្លួន មួយនេះ ជាហេតុ ជំរុញឱ្យតម្លៃប្រេងឥន្ធនៈ កើនឡើង ទូទាំងពិភពលោក ខណៈដែល នាវាមួយចំនួន ដែលគឃ្លើន មិនស្តាប់តាមការណែនាំ ត្រូវបាន អ៊ីរ៉ង់ វាយប្រហារ ។

យ៉ាងណា ទីក្រុងតេហេរ៉ង់ ធ្លាប់អះអាងថា នាវារបស់បណ្តាប្រទេសជាមិត្ត អាចឆ្លងកាត់បាន ឬ កប៉ាល់ដឹកទំនិញ របស់ប្រទេសផ្សេងៗទៀត ឲ្យតែទទួលបានការអនុញ្ញាត ពីប្រទេសអ៊ីរ៉ង់ ៕

ប្រភពពី AFP ប្រែសម្រួល ៖ សារ៉ាត