ប៉េកាំង ៖ ប្រទេសចិន បានបង្ហាញក្តីសង្ឃឹមថា ភាគីពាក់ព័ន្ធទាំងអស់ក្នុងសង្គ្រាមអ៊ីរ៉ង់ នឹងក្តាប់យកឱកាស ដើម្បីសន្តិភាព និងដោះស្រាយការខ្វែងគំនិតគ្នារបស់ពួកគេ តាមរយៈកិច្ចសន្ទនាដោយសន្តិវិធី ។

ការសង្ឃឹមបែបនេះរបស់ចិន ធ្វើឡើងស្របពេលដែលប្រធានាធិបតីអាមេរិក លោក ដូណាល់ ត្រាំ បានយល់ព្រមពន្យារពេលទម្លាក់គ្រាប់បែកលើប្រទេសអ៊ីរ៉ង់រយៈពេលពីរសប្តាហ៍ ជាថ្នូរដែលអ៊ីរ៉ង់ព្រមបើកច្រកសមុទ្រ Hormuz ឡើងវិញទាំងស្រុង និងដោយសុវត្ថិភាព ។

អ្នកនាំពាក្យក្រសួងការបរទេសចិន អ្នកស្រី Mao Ning បាននិយាយនៅថ្ងៃ អង្គារ ថា ចិនស្វាគមន៍កិច្ចខិតខំប្រឹងប្រែងទាំងអស់ ដែលនាំមកនូវសន្តិភាព ហើយនឹងគាំទ្រកិច្ចខិតខំសម្របសម្រួលដ៏សកម្មរបស់ប៉ាគីស្ថានផងដែរ ។

អ្នកស្រី Ning បានសង្កត់ធ្ងន់ថា បទឈប់បាញ់បន្ទាន់ និងការចាប់ផ្តើមកិច្ចសន្ទនាឡើងវិញ គឺជាបំណងរួមរបស់សហគមន៍អន្តរជាតិ ហើយថា ចិនក៏ត្រៀមខ្លួនផងដែរ ក្នុងការដើរតួលក្ខណៈស្ថាបនា ពាក់ព័ន្ធនឹងសង្គ្រាមមួយនេះ ៕

ប្រភព ៖ Arab News ប្រែសម្រួល ៖ ឈឹម ទីណា