តេហេរ៉ង់ ៖ ឃ្លាំងស្តុកគ្រាប់មីស៊ីល និងយន្តហោះគ្មានមនុស្សបើករបស់ប្រទេសអ៊ីរ៉ង់ គឺមានគ្រប់គ្រាន់ ដើម្បីអាចធ្វើសង្គ្រាមជាមួយសត្រូវបានរហូតដល់រាប់ឆ្នាំ នេះបើតាមការអះអាងរបស់សមាជិកសភាជាន់ខ្ពស់អ៊ីរ៉ង់មួយរូប កាលពីថ្ងៃ ពុធ ក្នុងបទសម្ភាសន៍ជាមួយទីភ្នាក់ងារសារព័ត៌មាន Tasnim ។

អនុប្រធានគណៈកម្មការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់ លោក Alaeddin Boroujerdi បានថ្លែងបែបអំណួតថា ប្រទេសអ៊ីរ៉ង់ មិនទាន់បង្ហាញពីសមត្ថភាពវាយប្រហារពេញលេញរបស់ខ្លួននៅឡើយទេ ហើយទីក្រុងតេហេរ៉ង់ ក៏នៅមិនទាន់បញ្ចេញសន្លឹកបៀរថ្មីរបស់ខ្លួននៅឡើយដែរ ។

ជាមួយគ្នានេះ លោក Boroujerdi ក៏បានច្រានចោលនូវអ្វីដែលលោកពិពណ៌នាថាជា «ការបិទផ្លូវកងទ័ពជើងទឹក» ដោយហៅវាថា គ្មានប្រសិទ្ធភាព ហើយបានអះអាងថា នាវាប្រហែល ១២០គ្រឿងកំពុងរង់ចាំនៅជិតច្រកសមុទ្រ Hormuz សម្រាប់ការដឹកជញ្ជូន ។ លោកថា នាវាអ៊ីរ៉ង់ជាច្រើនកំពុងបន្តប្រតិបត្តិការដោយគ្មានការអន្តរាគមន៍ពីកងកម្លាំងអាមេរិកឡើយ ។

លោក Boroujerdi ដែលមានវ័យ៧៥ឆ្នាំរូបនេះ បានសង្កត់ធ្ងន់ទៀតថា អ៊ីរ៉ង់នឹងមិនដកថយពីអ្វីដែលលោកបានពិពណ៌នាថា ជាសិទ្ធិអធិបតេយ្យភាពរបស់ខ្លួនលើច្រកសមុទ្រ Hormuz ឡើយ ដោយលោកនិយាយថា បញ្ហាច្រកសមុទ្រដ៏សំខាន់នេះ នឹងត្រូវបន្តលើកមកចរចាជាមួយសហរដ្ឋអាមេរិក ។

បើតាម Anadolu, សង្គ្រាមរវាងសហរដ្ឋអាមេរិក និងអ៊ីស្រាអែលជាមួយអ៊ីរ៉ង់ បានចាប់ផ្តើមឡើងកាលពីចុងថ្ងៃខែកុម្ភៈ ហើយបទឈប់បាញ់មួយត្រូវបានប្រកាសនៅថ្ងៃទី៨ ខែមេសា ដោយមានការសម្របសម្រួលពីប៉ាគីស្ថាន ។

មុនពេលផុតកំណត់ លោកប្រធានាធិបតី Trump បានប្រកាសពន្យារពេលបទឈប់បាញ់នេះថែមទៀតដោយគ្មានកាលកំណត់ ខណៈការចរចាសន្តិភាពនៅតែបន្តជាប់គាំង ៕

ប្រភព ៖ Anadolu ប្រែសម្រួល ៖ ឈឹម ទីណា