អ.ស.ប ៖ ចិន បានអំពាវនាវឱ្យអន្តរជាតិ រារាំងជប៉ុន ពីការទទួលបានអាវុធនុយក្លេអ៊ែរ អំឡុងសន្និសីទស្តីពីការរំសាយអាវុធនុយក្លេអ៊ែរ នៅឯទីស្នាក់ការ អង្គការសហប្រជាជាតិ ស្ថិតក្នុងទីក្រុងញូវយ៉ក សហរដ្ឋអាមេរិក។

ថ្លែងនៅក្នុងសន្និសីទពិនិត្យឡើងវិញ នៃភាគីនៃសន្ធិសញ្ញា ស្តីពីការមិនរីកសាយភាយនៃអាវុធនុយក្លេអ៊ែរ ហៅកាត់ NPT ថ្មីៗនេះ ប្រធាននាយកដ្ឋានគ្រប់គ្រងអាវុធ របស់ក្រសួងការបរទេសចិន លោក Sun Xiaobo បានកត់សម្គាល់ថា ប្រទេសជប៉ុនកំពុងជំរុញឱ្យកែប្រែរដ្ឋធម្មនុញ្ញសន្តិភាពនិយមរបស់ខ្លួន និង ពិនិត្យមើលគោលការណ៍មិនរីកសាយភាយអាវុធនុយក្លេអ៊ែរ ចំនួនបី។ លោកបានបន្ថែមថា ការប៉ុនប៉ងលើអាវុធនុយក្លេអ៊ែរ របស់ជប៉ុន ត្រូវតែរារាំង យ៉ាងម៉ឺងម៉ាត់។

ជាការឆ្លើយតប, ឯកអគ្គរាជទូតជប៉ុន លោកស្រី Ichikawa Tomiko បានច្រានចោលការអះអាងនេះ ដោយនិយាយថា រដ្ឋាភិបាលជប៉ុនប្រកាន់ខ្ជាប់ នូវគោលនយោបាយរបស់ខ្លួន ជុំវិញគោលការណ៍មិនរីកសាភាយនុយក្លេអ៊ែរ។ លោកស្រី បាននិយាយថា ក្នុងនាមជាប្រទេសតែមួយគត់ ដែលទទួលរងការទម្លាក់គ្រាប់បែកបរមាណូ ក្នុងសង្គ្រាម, ប្រទេសជប៉ុន នឹងបន្តធ្វើការយ៉ាងជិតស្និទ្ធ ជាមួយសហគមន៍អន្តរជាតិ ឆ្ពោះទៅរកការសម្រេចបាន នូវពិភពលោក ដែលគ្មានអាវុធនុយក្លេអ៊ែរ។

យ៉ាងណា លោក Sun Xiaobo បានតបតវិញ ដោយនិយាយថា ជប៉ុនបានស្តុកទុកនូវសារធាតុ plutonium ដ៏ច្រើនសន្ធឹកសន្ធាប់ ជាយូរមកហើយ លើសពីតម្រូវការខាងស៊ីវិល។ ប៉ុន្តែ លោកស្រី Ichikawa បានបដិសេធចំពោះការលើកឡើងនេះ ដោយនិយាយថា មិនមានបញ្ហាទាក់ទងនឹងការមិនរីកសាយភាយនុយក្លេអ៊ែរ នោះទេ៕

ប្រភពពី NHK ប្រែសម្រួល ៖ សារ៉ាត