វ៉ាស៊ីនតោន ៖ នាវាផ្ទុកយន្តហោះ USS Gerald R. Ford បានចាកចេញពីតំបន់មជ្ឈិមបូព៌ា បន្ទាប់ពីបានចូលរួម នៅក្នុងប្រតិបត្តិការប្រឆាំងនឹងប្រទេសអ៊ីរ៉ង់ នេះបើតាមសារព័ត៌មាន ក្នុងស្រុករាយការណ៍ កាលពីថ្ងៃសុក្រ ដោយបានដកស្រង់សម្តី មន្ត្រីអាមេរិកម្នាក់។

ការផ្លាស់ប្តូរនេះ បានបន្សល់ទុកនូវនាវាផ្ទុកយន្តហោះអាមេរិក ចំនួនពីរគ្រឿង នៅក្នុងតំបន់ គឺ នាវា USS Abraham Lincoln និង នាវា USS George H.W. Bush។

សហរដ្ឋអាមេរិក និងអ៊ីស្រាអែល បានបើកការវាយលុករួមគ្នាទៅលើអ៊ីរ៉ង់ កាលពីថ្ងៃទី២៨ ខែកុម្ភៈ ជាហេតុនាំឲ្យមានការសងសឹក ដោយការវាយប្រហារ លើអ៊ីស្រាអែល និងបណ្តាប្រទេស ក្នុងតំបន់ផ្សេងទៀត ដែលមានមូលដ្ឋានយោធា សហរដ្ឋអាមេរិក។

បើតាម Anadolu, ប្រតិបត្តិការ រវាងអាមេរិក និងអ៊ីស្រាអែល បានសម្លាប់មនុស្សជាង ៣,៣០០នាក់ នេះបើយោងតាមអាជ្ញាធរអ៊ីរ៉ង់ មុនពេលដែលទីក្រុងវ៉ាស៊ីនតោន និងទីក្រុងតេហេរ៉ង់ បានប្រកាសបទឈប់បាញ់ រយៈពេល ពីរ សប្តាហ៍ នៅថ្ងៃទី៨ ខែមេសា ដែលសម្របសម្រួល ដោយប៉ាគីស្ថាន។

ប្រធានាធិបតីអាមេរិក លោក Donald Trump បានប្រកាសពន្យារពេលបទឈប់បាញ់ ដែលផុតកំណត់ថ្ងៃទី២១ ខែមេសា តាមសំណើ របស់នាយករដ្ឋមន្ត្រីប៉ាគីស្ថាន៕

ប្រភពពី Anadolu ប្រែសម្រួល ៖ សារ៉ាត